Breaking News !! សារបែកធ្លាយ រំលឹករឿងចាស់របស់ស៊ីភីភី៖ ថ្នាក់ដឹកនាំបក្សកាន់អំណាចចេញលិខិតបង្គាប់មជ្ឈដ្ឋាននានាឲ្យធ្វើញត្តិគាំទ្ររឿងផែនទី !
លិខិតមួយរបស់គណបក្សកាន់អំណាចចុះថ្ងៃទី៩ កញ្ញា ដែលមានបោះត្រាថា ជាឯកសារសម្ងាត់ ត្រូវបានអ្នកប្រើប្រាស់បណ្ដាញសង្គមហ្វេសប៊ុក (Facebook) ចែកចាយគ្នាជាបន្តបន្ទាប់។ ឯកសារនេះមានខ្លឹមសារណែនាំប្រធានគណៈកម្មាធិការបក្សរបស់ខ្លួនតាមរាជធានី-ខេត្ត ឲ្យបំផុសមជ្ឈដ្ឋាននានាធ្វើញត្តិគាំទ្រសេចក្ដីថ្លែងការណ៍របស់លោកនាយករដ្ឋមន្ត្រី ហ៊ុន សែន ស្ដីពីបញ្ហាផែនទី និងព្រំដែនថ្មីៗនេះ។ យ៉ាងណាក៏ដោយ អ្នកនាំពាក្យគណបក្សនេះបញ្ជាក់ថា នោះមិនមែនជាឯកសារសម្ងាត់ទេ។
លិខិតដែលមានបោះត្រាថា «សម្ងាត់» នោះ ចុះហត្ថលេខាដោយ លោក សាយ ឈុំ អនុប្រធានគណបក្សប្រជាជនកម្ពុជា សរសេរទៅកាន់ប្រធានគណៈកម្មាធិការបក្សនៅគ្រប់រាជធានី-ខេត្ត។ ក្នុងលិខិតនោះ លោក សាយ ឈុំ ណែនាំឲ្យសមាជិកគណបក្សលោក «យកចិត្តទុកដាក់បំផុសបំផុលណែនាំឲ្យមជ្ឈដ្ឋាននានា ធ្វើញត្តិគាំទ្រសេចក្ដីថ្លែងការណ៍របស់ លោក ហ៊ុន សែន ស្ដីពីបញ្ហាផែនទី និងព្រំដែន ដែលធ្វើឡើងកាលពីថ្ងៃទី៨ កញ្ញា»។
ពាក្យថា «មជ្ឈដ្ឋាននានា» ដែល លោក សាយ ឈុំ សរសេរនៅក្នុងលិខិតនោះ គឺសំដៅដល់មន្ត្រីរាជការ កងកម្លាំងប្រដាប់អាវុធ គ្រូបង្រៀន ព្រះសង្ឃ អាជីវករ កម្មករ កសិករ សិស្សនិស្សិត អង្គការសង្គមស៊ីវិល។ល។
ក្នុងលិខិតដដែលនោះ លោក សាយ ឈុំ ក៏បានណែនាំដល់សមាជិកបក្សរបស់ខ្លួន ឲ្យផ្សព្វផ្សាយញត្តិដែលធ្វើរួចទាំងអស់នៅតាមប្រព័ន្ធផ្សព្វផ្សាយនានាឲ្យបានទូលំទូលាយ និងត្រូវផ្ញើ ១ច្បាប់ទៅខុទ្ទកាល័យគណៈកម្មាធិការកណ្ដាលឲ្យបានឆាប់ ដើម្បីខុទ្ទកាល័យជួយផ្សព្វផ្សាយបន្តទៀត។
យ៉ាងណាក៏ដោយ លិខិតដែលមានត្រាថា «សម្ងាត់» នោះ ត្រូវបានអ្នកនាំពាក្យគណបក្សប្រជាជនកម្ពុជា លោក សុខ ឥសាន បញ្ជាក់ប្រាប់វិទ្យុអាស៊ីសេរី នៅថ្ងៃទី១១ កញ្ញា ថា វាមិនមែនជាឯកសារសម្ងាត់នោះទេ។ លោកថា ប្រហែលជាអ្នកបោះត្រាមានការភ័ន្តច្រឡំ៖ «ជាទម្លាប់អ៊ីចឹង អាហ្នឹងគណបក្សប្រជាជនវាមានវិន័យ។ បាទ! ធ្វើអីគឺថា មានគោលការណ៍ពីថ្នាក់ដឹកនាំពីលើដល់ក្រោម។ អាហ្នឹងវាសបញ្ជាក់ថា យើងឯកភាពសាមគ្គី ឯកភាពផ្ទៃក្នុងល្អរឹងមាំពីលើដល់ក្រោម។ និយាយមួយម៉ាត់ណាគឺនិយាយមួយម៉ាត់ហ្នឹងដូចគ្នា។ មិនមែននិយាយជាមួយប្រធានឆ្វេង ហើយបើអនុប្រធានស្ដាំ ហើយបុគ្គលិកឯណាត្រង់ទៅលើទៅក្រោមអីទេ។ អាហ្នឹងគណបក្សប្រជាជនគ្មានទម្លាប់ហ្នឹងទេ»។
អ្នកនាំពាក្យរូបនេះ ក៏បដិសេធដែរថា លិខិតនោះមិនមានចរិតបង្គាប់បញ្ជាមន្ត្រីក្រោមឱវាទ ឲ្យធ្វើញត្តិគាំទ្រប្រសាសន៍លោកនាយករដ្ឋមន្ត្រី ពីរឿងផែនទី និងព្រំដែនដ៏ចម្រូងចម្រាសនោះឡើយ៖ «ពាក្យថាបំផុសហ្នឹង ដើម្បីធ្វើម៉េចឲ្យជ្រួតជ្រាបគ្រប់កន្លែងទាំងអស់ឲ្យវាផុសចេញមក ឲ្យវាជ្រួតជ្រាប ឲ្យវាមានការគគ្រឹកគគ្រេង ដើម្បីឲ្យវាគាំទ្រហ្នឹងឲ្យវាឃើញថា មានសំឡេងគាំទ្រហ្នឹងច្រើន ឲ្យវាមានការគាំទ្រទូទាំងប្រទេស»។
ការលេចចេញនូវលិខិតដែលមានត្រា «សម្ងាត់» នេះ កើតឡើងបន្ទាប់ពីគេសង្កេតឃើញមានញត្តិគាំទ្រជាហូរហែ ធ្វើឡើងដោយស្ថាប័នរដ្ឋ និងបុគ្គលមន្ត្រីរាជការជាច្រើន។ ស្ថាប័នរដ្ឋ ដែលបានធ្វើញត្តិគាំទ្រទាំងនោះ មានដូចជា រដ្ឋសភា ទីស្ដីការគណៈរដ្ឋមន្ត្រី អាជ្ញាធរសវនកម្មជាតិ ក្រសួងការបរទេស និងក្រសួងស្ថាប័នរដ្ឋជាច្រើនទៀត។
ខ្លឹមសារញត្តិមួយចំនួន មិនត្រឹមតែគាំទ្រប្រសាសន៍លោកនាយករដ្ឋមន្ត្រី អំពីរឿងផែនទី និងព្រំដែននោះទេ ថែមទាំងថ្កោលទោសអ្នកដែលចោទប្រកាន់ថា រដ្ឋាភិបាលប្រើផែនទីក្លែងក្លាយទៀតផង។
ពាក់ព័ន្ធខ្លឹមសារលិខិតរបស់គណបក្សប្រជាជនកម្ពុជា ដែលជំរុញសមាជិកបក្សឲ្យធ្វើញត្តិនេះ នាយកប្រតិបត្តិអង្គការខុមហ្វ្រែល (COMFREL) លោក គល់ បញ្ញា ចាត់ទុកការចេញលិខិតរបស់គណបក្សនេះ ថាជារឿងធម្មតារបស់គណបក្សនយោបាយ ប៉ុន្តែលោកថា អ្វីដែលជាបញ្ហា គឺនៅត្រង់អ្នកដែលចេញញត្តិនោះ ធ្វើតាមបញ្ជារបស់គណបក្សនយោបាយ ទាំងពួកគេមានតួនាទីជាមន្ត្រីសាធារណៈដែលត្រូវមានជំហរអព្យាក្រឹត្យ៖ «រឿងហ្នឹង រឿងធំ អ្នកទៅធ្វើទេ។ លិខិតហ្នឹងវាដូចជាគ្មានអីត្រូវរឿងអាថ៌កំបាំង រឿងអីហ្នឹង ខ្ញុំគិតដូចតែគាត់ដែរហ្នឹង វាមិនមែនជាបញ្ហាទេ។ គាត់ទៅបញ្ជាទៅបញ្ជាឲ្យ ឬគាត់ណែនាំឲ្យទៅមន្ត្រីគណបក្សគាត់ទេ មន្ត្រីកាន់ការងារគណបក្សទេ។ វាបញ្ហាគ្រាន់តែថា មន្ត្រីគណបក្សគាត់ថ្នាក់ក្រោមហ្នឹង វាជាមន្ត្រីរាជការដែរ វាជាមន្ត្រីកងកម្លាំងប្រដាប់អាវុធដែរ វាជាមន្ត្រីតុលាការដែរ។ រឿងហ្នឹងវាអ៊ីចេះទេ វាច្របូកច្របល់ត្រង់ហ្នឹងគណបក្សប្រជាជន»។
លោក គល់ បញ្ញា កត់សម្គាល់ថា បញ្ហាសំខាន់នៃរឿងនេះ គឺភាពមិនដាច់ស្រឡះរវាងតួនាទីរដ្ឋ និងតួនាទីបក្ស។
ការដែលមន្ត្រីរាជការ ឬកងកម្លាំងប្រដាប់អាវុធ ធ្វើញត្តិគាំទ្រប្រសាសន៍លោកនាយករដ្ឋមន្ត្រី ត្រូវបានគេកត់សម្គាល់ឃើញថា តែងតែកើតមានក្រោយពេល លោក ហ៊ុន សែន ធ្វើសេចក្ដីថ្លែងការណ៍ពាក់ព័ន្ធនឹងបញ្ហាចម្រូងចម្រាសផ្សេងៗជាមួយគណបក្សប្រឆាំង ហើយញត្តិគាំទ្រទាំងនោះតែងត្រូវបានប្រព័ន្ធផ្សព្វផ្សាយ ដែលមាននិន្នាការទៅរកគណបក្សកាន់អំណាច យកទៅចុះផ្សាយជាហូរហែ។
ក្រុមប្រឹក្សាឃ្លាំមើលកម្ពុជាថ្កោលទោស
ក្រុមប្រឹក្សាឃ្លាំមើលកម្ពុជា ដែលមានមូលដ្ឋានក្នុងប្រទេសន័រវែស (Norway) បានចេញសេចក្ដីថ្លែងការណ៍ថ្កោលទោស លិខិតគណបក្សកាន់អំណាចចុះថ្ងៃទី៩ ខែកញ្ញា ដែលមានបោះត្រាថា ជាឯកសារ «សម្ងាត់» ចាត់តាំងអោយមន្ត្រីគណបក្សប្រជាជនកម្ពុជា គ្រប់លំដាប់ថ្នាក់ធ្វើញត្តិគាំទ្រសេចក្ដីថ្លែងការណ៍របស់លោកនាយករដ្ឋមន្ត្រី ហ៊ុន សែន ស្ដីពីបញ្ហាផែនទីនិងព្រំដែន។
ក្រុមប្រឹក្សាឃ្លាំមើលកម្ពុជា ចាត់ទុកថា នេះគឺជាការយកស្ថាប័នរបស់រដ្ឋជាឧបករណ៍ដែលធ្វើបាត់អព្យាក្រឹតភាពមន្ត្រីរាជការ។
ក្រុមប្រឹក្សាឃ្លាំមើលកម្ពុជា ក៏ថ្កោលទោសដែរ ចំពោះការប៉ុនប៉ងចាប់ខ្លួនសកម្មជនបន្ថែមករណីចោទប្រកាន់ផែនទីក្លែងក្លាយ។ ពាក់ព័ន្ធនឹងខ្លឹមសារលិខិតរបស់គណបក្សប្រជាជនកម្ពុជា នេះ លោក គល់ បញ្ញា នាយកប្រតិបត្តិអង្គការខុមហ្វ្រែល (COMFREL) លិខិតធ្វើជាមន្ត្រីសាធារណៈបាត់បង់ជំហរអព្យាក្រឹត្យ។
កាលពីដើមសប្ដាហ៍នេះ លោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរទូទាំងប្រទេស ចាប់ខ្លួនបុគ្គលណាដែលណាហ៊ាននិយាយថា ផែនទីរដ្ឋាភិបាលប្រើប្រាស់បោះបង្គោលព្រំដែន ជាផែនទីក្លែងក្លាយ ឬផែនទីចោរ៕
 |
| លិខិតមួយរបស់គណបក្សកាន់អំណាចចុះថ្ងៃទី៩ ខែកញ្ញា ឆ្នាំ២០១៥ បោះត្រាជាឯកសារសម្ងាត់ត្រូវបានអ្នកប្រើប្រាស់បណ្ដាញសង្គមហ្វេសប៊ុក (Facebook) ចែកចាយគ្នានៅថ្ងៃទី១១ ខែកញ្ញា ឆ្នាំ២០១៥។ |
ប្រភព ៖ វិទ្យុអាស៊ីសេរី
No comments:
Post a Comment