ចៅអធិការវត្តចាក់អង្ករយកអង្កាម ចេញមុខមកបំភ្លឺ រឿងវាយកម្ទេចព្រះវិហារដែលជាបេតិកភណ្ឌជាតិខ្មែរចោល! បន្ទាប់ពីត្រូវពុទ្ធសាសនិកជនខ្មែរទាំងឡាយបានធ្វើការរិះគន់វាយប្រហារយ៉ាងខ្លាំងៗជាបន្តបន្ទាប់ !!

ចៅអធិការវត្តចាក់អង្ករយកអង្កាម ព្រោះចង់បានលាភសក្ការៈពីការសាងសង់ព្រះវិហារថ្មី បានចេញមុខបំភ្លឺ ករណីរឿងវាយកម្ទេចព្រះវិហារដែលជាបេតិកភណ្ឌជាតិខ្មែរចោល! បន្ទាប់ពីត្រូវពុទ្ធសាសនិកជនខ្មែរទាំងឡាយបានធ្វើការរិះគន់វាយប្រហារយ៉ាងខ្លាំងៗជាបន្តបន្ទាប់ !!

ខេត្តកំពង់ធំ ៖ ព្រះវិហារនៅវត្តឥន្ទ្រីសំវរៈ បានសាងសង់តាំងពីឆ្នាំ១៩៤៨ ហើយដាក់ជាបេតិកភណ្ឌជាតិនៅឆ្នាំ ២០០៧ ត្រូវបានព្រះមេគុណ និងជាព្រះចៅអធិការវត្ត ព្រមទាំងគណៈកម្មការវត្តទាំងអស់សម្រេចជាឯកច្ឆ័នវាយកម្ទេចចោលតាំងពីថ្ងៃទី២៨ សីហា ២០១៧ ក្រោមហេតុផលថា ព្រះវិហារមួយនេះ មានសភាពទ្រុឌទ្រោមយ៉ាងខ្លាំង ជាពិសេសដំបូលព្រះវិហារតែម្ដង ដែលអាចដាក់រលំបង្កមានគ្រោះថ្នាក់ដល់ព្រះសង្ឃជាយថាហេតុ នៅពេលណាមួយ ។

ព្រះវិហារនៅវត្តឥន្ទ្រីសំវរៈ ហៅវត្តកំពង់ធំ ស្ថិតនៅទីរួមខេត្តកំពង់ធំ ដែលត្រូវបានសាងសង់តាំងពីឆ្នាំ១៩៤៨ ពោលមានរយៈពេល៦៩ឆ្នាំមកហើយ ។

ការវាយកម្ទេចព្រះវិហារវ័យចំណាស់មួយខ្នងនេះចោល ត្រូវបានទទួលការរិះគន់ជាបន្ដបន្ទាប់ ពីមជ្ឈដ្ឋានជាច្រើន ក្នុងបណ្តាញសង្គមហ្វេសប៊ុក រហូតដល់រដ្ឋមន្ដ្រីក្រសួងព័ត៌មានលោក ខៀវ កាញារីទ្ធ និង រដ្ឋមន្ត្រីក្រសួងវប្បធម៍ និងវិចិត្រសិល្បៈ ថែមទៀតផង ហើយអ្នករិះគន់ខ្លះទៀត បានប្រើពាក្យអសុរស ទៅលើព្រះមេគុណ ដែលជាព្រះចៅអធិការវត្តនេះ ។

លោក ខៀវ កាញារីទ្ធ បានសរសេរនៅលើហ្វេសប៊ុកផ្លូវការរបស់លោក អោយដឹងថា «វត្តឥន្ទ្រីសំវរៈ ហៅវត្តកំពង់ធំ ត្រូវបានសាងសង់នៅឆ្នាំ១៦៣៣ ឯព្រះវិហារសាងសង់ឆ្នាំ១៩៤៨ ហើយដាក់ជាបេតិកភណ្ឌជាតិនៅឆ្នាំ២០០៧ ។ វិហារនេះមានរូបគំនូរបុរាណជាច្រើន ។ តែពេលនេះព្រះសង្ឃរាជវត្ត បានសំរេចឲ្យវាយចោលឥតស្តាយស្រណោះ» ។

ចំណែកឯលោកជំទាវ ភឿង សកុណា រដ្ឋមន្ត្រីក្រសួងវប្បធម៍ និងវិចិត្រសិល្បៈ បានសរសេរតាមរយៈខមិន អោយដឹងថា «មន្ត្រីជំនាញទៅហាមឃាត់ពេលល្ងាច លោកថាអាត្មាដឹងហើយ ស្អែកឡើងទៅដល់ រាបដល់ដី លោកប្រឹងសម្រុកវាយចោលទាំងយប់ ។ មិនយល់ ត្រង់ថា អ្នកដែលគួរជាអ្នកថែរក្សា បែរទៅជាប្រឹងបំផ្លាញទៅវិញ ។ តើបានចំណេញអ្វី ពីការបំផ្លាញបេតិកភណ្ឌជាតិនេះ ក្រៅពីការឈឺចាប់សម្រាប់វប្បធម៌ខ្លួន? » ។

ឆ្លើយតបនៅការរិះគន់ខ្លាំងៗជាបន្ដបន្ទាប់ និងតាមរយៈបណ្ដាញសង្គមហ្វេសប៊ុកជាច្រើននោះ ព្រះតេជគុណ សៀង សុខ ជាព្រះមេគុណខេត្ត និងជាព្រះចៅអធិការវត្តមើលការខុសត្រូវ និងគ្រប់គ្រង់វត្តមួយនេះ បានចេញមកបកស្រាយពីការពិត និងលើកហេតុផលមួយចំនួន ដែលនាំឲ្យមានការវាយចោល ហើយធ្វើការកសាងព្រះវិហារឡើងវិញ តាមរយៈការចូលបច្ច័យពីពុទ្ធបរិស័ទ ក៏ដូចជាថ្នាក់ដឹកនាំផងដែរ ។

នៅព្រឹកថ្ងៃទី០១ ខែកញ្ញា ឆ្នាំ២០១៧ នេះ ព្រះតេជគុណ សៀង សុខ បានមានសង្ឃដីកា បំភ្លឺតាមរយៈដល់អង្គភាពព័ត៌មានក្នុងស្រុកមួយ អោយដឹងថា តាមពិតទៅគម្រោងជួសជុលព្រះវិហារឡើងវិញ រួមទាំងដំបូលផងនោះ គឺព្រះអង្គ រួមទាំងគណៈកម្មការវត្ត បានពិភាក្សា និងសម្រេចឲ្យមានការជួលជុលច្រើនដង ប៉ុន្ដែធ្វើទៅមិនរួចដោយសារតែដំបូល ពុកផុយយ៉ាងខ្លាំង ហើយជញ្ជាំងអត់មានសសរគ្រឹះទៀតផង ។

ចំពោះរូបគំនូរនៅតាមជញ្ជាំងព្រះវិហារ ត្រូវបានព្រះតេជគុណលើកឡើងថា មានលក្ខណៈពិសេស ប៉ុន្ដែរូបគំនូរទាំងនេះ ត្រូវបានបាត់បន្ដិចម្ដងៗ ជាពិសេសនៅក្នុងសម័យប៉ុល ពត មានការលាបម្ស៉ៅមីធ្វើឲ្យលុបបំបាត់ ហើយមកដល់ពេលនេះក៏រងការខូចខាតជាច្រើនផងដែរ ។

ព្រះតេជគុណបានមានសង្ឃដីកាទៀតថា ព្រះវិហារនេះ ក៏ត្រូវបានក្រុមវិស្វករយល់ឃើញថា ព្រះវិហារនេះមិនអាចជួសជុលឡើងវិញបាននោះឡើយ ហើយអាចបង្កគ្រោះថ្នាក់ទៀតផង ។

សម្រាប់មជ្ឈដ្ឋានជាច្រើន បានរិះគន់ដោយម្នាក់ៗ សោកស្ដាយការវាយសំណង់ ពីបុរាណជាពិសេស គឺរូបគំនូរ នៅតាមជញ្ជាំងព្រះវិហារ ដោយម្នាក់ចោទជាសំនួរថា ហេតុអ្វីទៅចាំវវាយកម្ទេចចោល មិនទុកនៅដដែល ហើយសាងសង់ព្រះវិហារថ្មី ។ ត្រង់ចំណុចនេះ ព្រះតេជគុណ សៀង សុខ បានមានសង្ឃដីកាថា នៅក្នុងវត្តកំពង់ធំ មានបរិវេណតូចចង្អៀតគ្មានកន្លែងណា ដែលអាចសាងសង់ព្រះវិហារថ្មីបាននោះឡើយ ។

ពាក់ព័ន្ធទៅនឹងរឿងវាយព្រះវិហារខាងលើនេះដែរ អភិបាលខេត្តកំពង់ធំ លោក សុខ លូ ក៏បានអោយដឹងដែរថា «រឿងព្រះអង្គ ព្រះមេគណខេត្ត វាយអគារចាស់ទ្រុឌទ្រោមនេះ ខ្ញុំនឹងឲ្យអភិបាលក្រុងលោក ម៉ាក់ ប៊ុនហុង ចាត់ការធ្វើសន្និសីទកាសែតបំភ្លឺឆាប់ៗ ជូនសាធារណជន គឺបញ្ហានេះ ព្រះមេគណ បានដឹកនាំប្រជុំក្នុងគណៈកម្មការឯកភាពវាយចោល ហើយពុទ្ធបរិស័ទបានគាំទ្រចូលបច្ច័យកសាងថ្មីផងដែរ»។

លោក សុខ លូ បានបញ្ជាក់ថា អគារព្រះវិហារនេះ ពិតជាចាស់ទ្រុឌទ្រោម យូរឆ្នាំហើយអាចមានហានិភ័យគ្រប់ពេលវេលា ។ យើងមិនអាចគិតពីអភិរក្សរូបគំនូរចាស់លើជញ្ជាំងនោះ មិនគិតពីគ្រោះថ្នាក់ និងកសាងថ្មីបានទេ ៕

មកអានទស្សនៈរបស់មហាជនខ្មែរមួយចំនួនទៀត ៖

Maha Phirum "អាត្មាស្នើឲ្យក្រសួងធម្មការនិងសាសនា សម្តេចព្រះសង្ឃរាជទាំង ២ គណៈ ចាប់ផ្សឹកលោកនោះហើយប្រគល់ឲ្យរាជការចាត់ការតាមផ្លូវច្បាប់ដើម្បីជាគំរូដល់លោកសង្ឃអង្គដទៃដែលហ៊ានធ្វើទង្វើបំផ្លិចបំផ្លាញសម្បត្តិវប្បធម៌ជាតិ។"