ថ្ងៃនេះបុរសខ្លាំងហ៊ុនសែនបានឈានចូលដល់វ័យ 65ឆ្នាំហើយៗក៏ជានាយករដ្ឋមន្ត្រីនៃប្រទេសកម្ពុជាអស់ជាង 3ទសវត្សរ៍មកហើយដែរ, តើសិល្បៈនយោបាយរបស់លោកមានលក្ខណៈយ៉ាងណាដែរ?

ថ្ងៃនេះត្រូវនឹងថ្ងៃទី05 ខែសីហា ឆ្នាំ2017 បុរសខ្លាំងហ៊ុនសែនបានឈានចូលដល់វ័យ 65ឆ្នាំហើយៗក៏ជានាយករដ្ឋមន្ត្រីនៃប្រទេសកម្ពុជាអស់ជាង 3ទសវត្សរ៍មកហើយដែរ, តើសិល្បៈនយោបាយរបស់លោកមានលក្ខណៈយ៉ាងណាដែរ? តោះមកអានទស្សនៈរបស់បុរសខ្មែរម្នាក់វិភាគពីសិល្បៈនយោបាយរបស់បុរសខ្លាំងហ៊ុន សែន តើការពិតត្រូវយ៉ាងណាខ្លះដែរ? ក៏ពិចារណាដោយខ្លួនអ្នកចុះ !! ។

Ratanak Eng ៖ ថ្ងៃនេះ ថ្ងៃទី05 ខែសីហា ឆ្នាំ2017 នាយករដ្ឋមន្ត្រីនៃប្រទេសតូចក្រីក្រមួយអស់ជាង 3 ទសវត្សរ៍ លោក ហ៊ុន សែន ដែលត្រូវបានដាក់ងារថាជា បុរសខ្លាំង បានឈានចូលដល់វ័យ 65 ឆ្នាំ។ លោកកើតនៅថ្ងៃនេះ ខែនេះ ឆ្នាំ1952 ។

ជាអ្នកនយោបាយដោះស្រាយស្ថានការណ៍បែបជាក់ស្តែងនិយម លោក ហ៊ុន សែន ជាអ្នកដឹកនាំម្នាក់ដែលមានទេពកោសល្យនយោបាយចម្រុះ។ ពីការធ្លាប់ទទួលយកគំនិតកុម្មុយនីស្តទៅជាបើកការគិតសេរីជាងមុនបន្ទាប់ពីបញ្ចប់សង្គ្រាមត្រជាក់ ពីការប្រឆាំងចិនផ្កាប់មុខទៅជាការគាំទ្រចិនជាចំហ ពីអ្នកនយោបាយដែលមិនចេះភាសាអង់គ្លេសទៅជារដ្ឋមន្ត្រីការបរទេសដ៏វាងវៃម្នាក់ ពីសិល្បៈនយោបាយបញ្ចូលមនុស្សក្មេងៗចូលក្នុងក្រុមដឹកនាំជំនួសឲ្យមនុស្សចាស់ដែលមានតែបទពិសោធ តែខ្វះគំនិត និងនៅតែជានាយករដ្ឋមន្ត្រីម្នាក់ដែលពូកែខាងការទំនាក់ទំនង។ ត្បិតសិល្បៈនយោបាយរបស់លោកមានលក្ខណៈហិង្សាបន្តិច តែលោកចេះដោះស្រាយសភាពការណ៍ឲ្យទៅជាធូរស្រាល ហើយឲ្យសហគមន៍អន្តរជាតិទទួលយកបាន។

អ្នកនិពន្ធ អ្នកស្រាវជ្រាវ អ្នកអត្ថាធិប្បាយនយោបាយបរទេសល្បីៗជាច្រើនរូប រួមទាំងខ្ញុំផង យល់ស្របគ្នាថា លោក ហ៊ុន សែន ជាអ្នកពូកែដោះស្រាយសភាពការណ៍បែបជាក់ស្តែងនិយម។ សិល្បៈនយោបាយរបស់លោកមានលក្ខណៈខុសប្លែកពីមេដឹកនាំនយោបាយក្នុងស្រុកដទៃ៕

អត្ថបទដោយ ៖ Ratanak Eng