មន្ត្រីជាន់ខ្ពស់ក្រសួងមហាផ្ទៃអះអាងថាសមត្ថកិច្ចជំនាញរកឃើញតម្រុយមួយចំនួនដែលអាចឱ្យអតីតមេទ័ព និងជាប្រធានគណបក្សខ្មែររូបរួមជាតិបច្ចុប្បន្ន គឺលោកញឹក ប៊ុនឆៃ មិនអាចរួចខ្លួនពីច្បាប់ឡើយ!!

វិទ្យុអាស៊ីសេរី ៖ សមត្ថកិច្ចរកឃើញតម្រុយមួយចំនួនដែលនាំឱ្យលោក ញឹក ប៊ុនឆៃ មិនអាចរួចខ្លួនពីច្បាប់ ។

មន្ត្រីជាន់ខ្ពស់ក្រសួងមហាផ្ទៃ អះអាងថា ក្រោយពីធ្វើការសាកសួរអស់រយៈពេលជិត ២ថ្ងៃ នៅស្នងការដ្ឋាននគរបាលរាជធានីភ្នំពេញ គឺសមត្ថកិច្ចជំនាញរកឃើញតម្រុយមួយចំនួនដែលអាចឱ្យអតីតមេទ័ព និងជាប្រធានគណបក្សខ្មែររូបរួមជាតិបច្ចុប្បន្ន គឺលោក ញឹក ប៊ុនឆៃ គេចមិនផុតពីផ្លូវច្បាប់ឡើយ។

ការអះអាងនេះ ស្របពេលកងកម្លាំងសមត្ថកិច្ចប្រហែលជិត ៤០នាក់ មានទាំងកម្លាំងខាងព្រហ្មទណ្ឌ ដោយខ្លះមានប្រដាប់អាវុធវែងខ្លីជាច្រើនដើមផង នៅល្ងាចថ្ងៃទី៤ ខែកក្កដា បាននាំខ្លួនប្រធានគណបក្សខ្មែររួបរួមជាតិ លោក ញឹក ប៊ុនឆៃ ទៅឆែកឆេរដល់គេហដ្ឋានរបស់លោកផ្ទាល់ដើម្បីតាមស្វែងរកភស្តុតាងបន្ថែមទៀត ជុំវិញដំណើររឿងពាក់ព័ន្ធនឹងបទល្មើសគ្រឿងញៀនកាលពីឆ្នាំ២០០៧។

មន្ត្រីនាំពាក្យក្រសួងមហាផ្ទៃ លោក ខៀវ សុភ័គ អះអាងថា មូលហេតុនាំឱ្យមានចុះឆែកឆេរផ្ទាល់ដល់គេហដ្ឋាន គឺបន្ទាប់ពីសមត្ថកិច្ចរកឃើញភស្តុតាងមួយចំនួនដែលបង្ហាញថា លោក ញឹក ប៊ុនឆៃ បានឃុបឃិត ទទួលបានផលប្រយោជន៍ជាទឹកប្រាក់ និងការគាំទ្រក្នុងបទល្មើសគ្រឿងញៀនកាលពីឆ្នាំ២០០៧ កន្លងទៅ៖ «មិនត្រូវរួចខ្លួនទេ ព្រោះមានការពាក់ព័ន្ធ ត្រូវរកឃើញហើយ»។

កាលពីថ្ងៃទី៣ ខែសីហា លោក ញឹក ប៊ុនឆៃ អតីតឧបនាយករដ្ឋមន្ត្រីរបស់គណបក្សហ្វ៊ុនស៊ិនប៉ិច ត្រូវបានព្រះរាជអាជ្ញារងនៃសាលាដំបូងរាជធានីភ្នំពេញ គឺលោក សៀង សុខ បង្គាប់ឱ្យសមត្ថកិច្ចនាំខ្លួនទៅសាកសួរនៅស្នងការដ្ឋាននគរបាលរាជធានីភ្នំពេញ ជុំវិញដំណើររឿងសមគំនិតពីបទផលិតគ្រឿងញៀនខុសច្បាប់ និងនាំចូលសារធាតុសម្រាប់ផ្សំគ្រឿងញៀន ប្រព្រឹត្តនៅចំណុចភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី១ ខែមេសា ឆ្នាំ២០០៧៕