អតីតប្រធានគណបក្សសង្គ្រោះជាតិ លោក សម រង្ស៊ី ថារដ្ឋាភិបាលបុរសខ្លាំងនៃអាណាចក្រខ្មែរសម្បូររាជានិងសម្បូរផ្កាយរះ កំពុងធ្វើរដ្ឋប្រហាររដ្ឋធម្មនុញ្ញ !!
អតីតប្រធានគណបក្សសង្គ្រោះជាតិ លោក សម រង្ស៊ី ថ្លែងថា រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន កំពុងធ្វើរដ្ឋប្រហាររដ្ឋធម្មនុញ្ញដើម្បីក្តោបក្តាប់អំណាចរបស់ខ្លួនបន្តទៀត ខណៈការបោះឆ្នោតជ្រើសតាំងតំណាងរាស្ត្រជិតចូលមកដល់។ លោក សម រង្ស៊ី ថាអ្វីដែលបក្សកាន់អំណាចកំពុងធ្វើ គឺសុទ្ធតែបង្ហាញនូវរូបភាពក្លែងក្លាយ នោះគឺប្រជាធិបតេយ្យក្លែងក្លាយ នីតិរដ្ឋក្លែងក្លាយ និងការអភិវឌ្ឍក្លែងក្លាយ។
អតីតមេបក្សប្រឆាំង លោក សម រង្ស៊ី ដែលកំពុងឋិតនៅក្រៅប្រទេសដោយសារបណ្តឹងរាប់មិនអស់នៅតុលាការ ថ្លែងចាត់ទុកស្ថានភាពនៅកម្ពុជា ក្នុងពេលបច្ចុប្បន្ន ថាតានតឹង និងយ៉ាប់យ៉ឺនជាងពេលណាៗទាំងអស់ ចាប់តាំងពីកម្ពុជា មានកិច្ចព្រមព្រៀងសន្តិភាពទីក្រុងប៉ារីស នៅឆ្នាំ១៩៩១ មក។
នៅក្នុងវីដេអូឃ្លីប (Video Clip) ជាង ៨នាទី ដែលបង្ហោះនៅលើទំព័រហ្វេសប៊ុក (facebook) នៅថ្ងៃទី២៧ សីហា លោក សម រង្ស៊ី ថ្លែងថា រដ្ឋាភិបាលសព្វថ្ងៃបានរំលោភទាំងកិច្ចព្រមព្រៀងសន្តិភាពក្រុងប៉ារីស ឆ្នាំ១៩៩១ ទាំងរដ្ឋធម្មនុញ្ញកម្ពុជា អនុសញ្ញា និងកតិកាសញ្ញាសិទ្ធិមនុស្សអន្តរជាតិនានាដែលកម្ពុជា បានចុះហត្ថលេខា និងយល់ព្រមអនុវត្ត។
ការថ្លែងរបស់អតីតមេបក្សប្រឆាំងចាស់វស្សានៅកម្ពុជា រូបនេះ គឺក្រោយពីរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន កំពុងរឹតបន្តឹងទៅលើអង្គការក្រៅរដ្ឋាភិបាល និងធ្វើទុក្ខបុកម្នេញលើប្រព័ន្ធផ្សព្វផ្សាយដែលរិះគន់រដ្ឋាភិបាល។
រដ្ឋាភិបាលបានសម្រេចបណ្តេញវិទ្យាស្ថានជាតិប្រជាធិបតេយ្យ (NDI) របស់សហរដ្ឋអាមេរិក ចេញពីប្រទេស បិទមិនឲ្យមានបន្ទប់ស្ថានការណ៍សម្រាប់ការបោះឆ្នោតរបស់សង្គមស៊ីវិល គំរាមបិទកាសែត ឌឹ ខេមបូឌា ដេលី (The Cambodia Daily) ខណៈស្ថានីយវិទ្យុមួយចំនួនដែលផ្សាយបន្តកម្មវិធីវិទ្យុរបស់គណបក្សសង្គ្រោះជាតិ អាស៊ីសេរី (RFA) វីអូអេ (VOA) និងវិទ្យុសំឡេងប្រជាធិបតេយ្យ វីអូឌី (VOD) ត្រូវបានក្រសួងព័ត៌មាន បិទទ្វារមិនឲ្យធ្វើអាជីវកម្ម ដោយចោទប្រកាន់ថាមិនបានគោរពប្រកាស និងកិច្ចសន្យាជាមួយក្រសួង។
ទោះជាយ៉ាងណា ចំណាត់ការរបស់រដ្ឋាភិបាលភ្លាមៗលើស្ថាប័នទាំងអស់នេះ ត្រូវបានគេមើលឃើញថា គ្រាន់តែជាយុទ្ធនាការនយោបាយរបស់រដ្ឋាភិបាល ដើម្បីបំបិទសំឡេងអ្នករិះគន់មុនពេលការបោះឆ្នោតជាតិមកដល់។
ក្រៅពីបញ្ហាទាំងអស់នេះ បក្សកាន់អំណាចក៏បានកែប្រែច្បាប់គណបក្សនយោបាយជាបន្តបន្ទាប់ ដើម្បីទាត់លោក សម រង្ស៊ី ចេញពីឆាកនយោបាយ និងធ្វើទុក្ខបុកម្នេញបក្សប្រឆាំង សង្គមស៊ីវិល ព្រមទាំងប្រើពាក្យសម្ដីគំរាមកំហែងដោយប្រើដំបង ឬគល់ឫស្សីវាយបំបែកធ្មេញ និងសំពងក្បាល ឬប្រើកម្លាំងកម្ទេចអ្នកតវ៉ាលទ្ធផលឆ្នោត ១០០ ឬ ២០០នាក់ ដើម្បីថែរក្សាសន្តិសុខជាតិ ជាដើម។
លោក សម រង្ស៊ី ថ្លែងថាអ្វីដែលបក្សកាន់អំណាចកំពុងធ្វើនេះ ដោយសារតែពួកគេដឹងថា ពលរដ្ឋអស់ជំនឿមកលើខ្លួន និងមិនគាំទ្រនៅក្នុងការបោះឆ្នោតក្នុងពេលខាងមុខ៖ «ដោយសារតែពួកគេមិនចង់ ហើយមិនព្រមចុះចេញពីអំណាចនៅឆ្នាំ២០១៨ ខាងមុខនេះ បានជាពួកគេប្រើអំណាចកាន់តែផ្ដាច់ការទៅៗ ដូចជាការលួចសម្លាប់បញ្ញវន្តអ្នកស្នេហាជាតិ ការចាប់ពលរដ្ឋដាក់ពន្ធនាគារកាន់តែច្រើនឡើងៗ ការបិទ និងត្រៀមបិទវិទ្យុ និងសារព័ត៌មានទាំងខ្មែរ និងបរទេសដែលហ៊ាននិយាយការពិត ហើយការបណ្តេញចេញអង្គការអន្តរជាតិដែលធ្វើសកម្មភាពដោយសន្តិវិធី ដោយស្របច្បាប់ដើម្បីលើកតម្កើងលទ្ធិប្រជាធិបតេយ្យនៅប្រទេសកម្ពុជា»។
លោក សម រង្ស៊ី ថ្លែងបន្តដោយដាក់រូបភាពអតីតមេដឹកនាំផ្ដាច់ការប្រទេសលីប៊ី (Libya) លោក មូអាម៉ា ហ្កាដាហ្វី (Muammar Gaddafi) និងអតីតប្រធានាធិបតីផ្ដាច់ការហ្វីលីពីន (Philippines) លោក ហ្វើឌីណាន់ ម៉ាកូស (Ferdinand Marcos) ថាជនផ្ដាច់ការណាក៏ដោយ របបព្រៃផ្សៃណាក៏ដោយ ក៏មិនអាចឈ្នះកម្លាំងពលរដ្ឋបានទេ។ លោក សម រង្ស៊ី ក៏អំពាវនាវឲ្យពលរដ្ឋនាំគ្នាទៅចុះឈ្មោះបោះឆ្នោតឲ្យបានគ្រប់ៗគ្នា ដើម្បីចូលរួមការបោះឆ្នោតនៅខែកក្កដា ឆ្នាំ២០១៨។
ប្រតិកម្មទៅនឹងការរិះគន់ធ្ងន់ៗរបស់លោក សម រង្ស៊ី អ្នកនាំពាក្យគណបក្សប្រជាជនកម្ពុជា លោក សុខ ឥសាន ថាបើបក្សកាន់អំណាចខ្លាចចាញ់ឆ្នោត ម្ល៉េះបក្សកាន់អំណាចមិនហ៊ានចាត់វិធានការចំពោះអង្គការក្រៅរដ្ឋាភិបាល និងប្រព័ន្ធផ្សព្វផ្សាយមួយចំនួនដែលរដ្ឋាភិបាលចោទថា បានប្រព្រឹត្តល្មើសច្បាប់នោះទេ។ លោកថា ការដែលហ៊ានចាត់វិធានការនេះ គឺបង្ហាញពីភាពខ្លាំងរបស់បក្សកាន់អំណាច ដើម្បីពង្រឹងលទ្ធិប្រជាធិបតេយ្យ និងនីតិរដ្ឋនៅកម្ពុជា៖ «ការដែលថាធ្វើរដ្ឋប្រហាររដ្ឋធម្មនុញ្ញ ខ្ញុំយល់អំពីការពិតជាក់ស្តែង ធាតុពិតគឺរដ្ឋាភិបាលកំពុងតែពង្រឹងការអនុវត្តរដ្ឋធម្មនុញ្ញដែលចេញពីខ្លឹមសារសំខាន់ៗនៃស្មារតីកិច្ចព្រមព្រៀងសន្តិភាពទីក្រុងប៉ារីស ដែលទាំងអស់គ្នាចង់បានឲ្យកម្ពុជា ដើរតាមគន្លងនៃលទ្ធិប្រជាធិបតេយ្យ និងពង្រឹងនីតិរដ្ឋនៅកម្ពុជា»។
ទោះជាយ៉ាងណា ក្រោយពីមានវិធានការជាបន្តបន្ទាប់របស់រដ្ឋាភិបាលចំពោះវិទ្យាស្ថានជាតិប្រជាធិបតេយ្យ (NDI) និងប្រព័ន្ធផ្សព្វផ្សាយ ប្រតិកម្មបានធ្លាក់មកមិនដាច់ដែរពីសង្គមស៊ីវិលក្នុងស្រុក និងសហគមន៍អន្តរជាតិ រួមមានពីឧត្តមក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុងហ្សឺណែវ (Geneva) ប្រទេសស្វីស ពីសមាជិកព្រឹទ្ធសភា និងរដ្ឋសភាសហរដ្ឋអាមេរិក ពីអតីតរដ្ឋមន្ត្រីការបរទេសសហរដ្ឋអាមេរិក និងជាប្រធានក្រុមប្រឹក្សាភិបាលនៃវិទ្យាស្ថានជាតិប្រជាធិបតេយ្យ អ្នកស្រី មែឌឺឡែន អលប្រ៉ាយថ៍ (Madeleine Albright) ពីសហភាពអឺរ៉ុប ពីសមាជិកសភាអាស៊ានសម្រាប់សិទ្ធិមនុស្ស និងពីអង្គការឃ្លាំមើលសិទ្ធិមនុស្សអន្តរជាតិ ជាដើម។
ពួកគេចាត់ទុកវិធានការរបស់រដ្ឋាភិបាលពេលនេះ ថាជាយុទ្ធនាការនយោបាយបែបផ្ដាច់ការ បំបិទសំឡេងអ្នកឯករាជ្យ បំបិទមាត់អ្នកហ៊ានតវ៉ាប្រឆាំង និងកំពុងរំលោភរដ្ឋធម្មនុញ្ញដែលធ្វើឲ្យប៉ះពាល់ដល់ដំណើរការបោះឆ្នោតជាតិខាងមុខ។
ចំណែកគណបក្សសង្គ្រោះជាតិ កាលពីថ្ងៃទី២៥ សីហា ក៏បានចេញសេចក្តីថ្លែងការណ៍បារម្ភថា ស្ថានភាពពេលបច្ចុប្បន្ននេះ នឹងធ្វើឲ្យប៉ះពាល់ដល់ដំណើរការបោះឆ្នោតនៅពេលខាងមុខ និងអំពាវនាវដល់សហគមន៍អន្តរជាតិ ជួយអន្តរាគមន៍ធ្វើយ៉ាងណាធានាឲ្យមានការគោរពសិទ្ធិសេរីភាពសារព័ត៌មាន និងលទ្ធិប្រជាធិបតេយ្យនៅកម្ពុជា ជាពិសេសធានាឲ្យការបោះឆ្នោតជាតិឆ្នាំ២០១៨ ខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌៕
ប្រភព ៖ វិទ្យុអាស៊ីសេរី
ចំណែកនៅលើទំព័រហ្វេសប៊ុករបស់លោក សម រង្ស៊ី លោកក៏បានសរសេរសារជូនប្រជារាស្ត្រខ្មែរ ជាលាយលក្ខណ៍អក្សរ ផងដែរ ។
២៧ សីហា ២០១៧ / 27 August 2017
សាររបស់លោក សម រង្ស៊ី ជូនប្រជារាស្ត្រខ្មែរ ជាលាយលក្ខណ៍អក្សរ។
Message from Sam Rainsy to the Khmer people in writing.
សូមជម្រាបសួរ បងប្អូនជនរួមជាតិ និងក្មួយៗ ជាទីគោរព និងជាទីនឹករលឹក ប៉ុន្មានសប្តាហ៍ចុងក្រោយនេះ ស្ថានការណ៍នយោបាយនៅប្រទេសកម្ពុជា បានឈានមកដល់ដំណាក់កាលមួយ ដែលមានសភាពការណ៍តានតឹង និងដុនដាប លើសពីពេលមុនៗទាំងអស់ តាំ
រដ្ឋាភិបាលសព្វថ្ងៃ បានរំលោភទាំងកិច្ចព្រមព្រៀងទីក្រុងប៉ារីស ទាំងរដ្ឋធម្មនុញ្ញ នៃប្រទេសកម្ពុជា និងទាំងអនុសញ្ញា និងកតិកាសញ្ញាទាំងអស់ ស្តីពីសិទ្ធិមនុស្ស និងសិទ្ធិពលរដ្ឋ ដែលប្រទេសកម្ពុជា បានចុះហត្ថលេខា ហើយបានយល់ព្រមគោរព និងអនុវត្ត កាលពីអតីតកាលថ្មីៗនេះ។ អ្វីដែលគេបានធ្វើ ប៉ុន្មានសប្តាហ៍ចុងក្រោយនេះ មិនខុសពីរដ្ឋប្រហារឡើយ តែមិនមែនជារដ្ឋប្រហារយោធាទេ គឺជារដ្ឋប្រហារធម្មនុញ្ញ ពីព្រោះជាការជាន់ឈ្លីរដ្ឋធម្មនុញ្ញ និងការព្យួរសិទ្ធិសេរីភាព និងការផ្អាកយន្តការប្រជាធិបតេយ្យទាំងអស់ ដែលមានចែងនៅក្នុងរដ្ឋធម្មនុញ្ញ។ អ្វីដែលនៅសេសសល់ គ្រាន់តែជាសម្បកក្រៅតែប៉ុណ្ណោះ គឺជារូបភាពក្លែងក្លាយ ដែលគ្មានន័យ និងគ្មានខ្លឹមសារពិតប្រាកដ ឬក៏ក្នុងន័យមួយ ដែលគេយកទៅកែច្នៃ ដើម្បីធ្វើផ្ទុយស្រឡះ ពីន័យពិតប្រាកដ នៃពាក្យនីមួយៗ។
វប្បធម៌នយោបាយ នៃអ្នកដឹកនាំប្រទេសយើងសព្វថ្ងៃ គឺជាវប្បធម៌ឈរលើភាពក្លែងក្លាយ ដូចជាប្រជាធិបតេយ្យក្លែងក្លាយ នីតិរដ្ឋក្លែងក្លាយ និងអភិវឌ្ឍក្លែងក្លាយ។ ប្រជាធិបតេយ្យសព្វថ្ងៃ គឺជាប្រជាធិបតេយ្យក្លែងក្លាយ ដែលរដ្ឋអំណាចផ្តាច់ការ រៀបចំឡើងជាសម្បកក្រៅ ដើម្បីគាបសង្កត់ និងធ្វើបាបប្រជារាស្ត្រតែប៉ុណ្ណោះ។ នីតិរដ្ឋសព្វថ្ងៃ ក៏ជានីតិរដ្ឋក្លែងក្លាយដែរ ពីព្រោះជាការសម្អាងលើច្បាប់ក្លែងក្លាយ ស្ថិតលើបបូរមាត់គេ ឬលើការស៊ុមក្រលុម របស់បក្ខពួកគេ ដើម្បីរំលោភគោលការណ៍លទ្ធិប្រជាធិបតេយ្យ ដែលមានចែងនៅក្នុងរដ្ឋធម្មនុញ្ញ។ ឯអភិវឌ្ឍសព្វថ្ងៃ ក៏ជាអភិវឌ្ឍក្លែងក្លាយដែរ ពីព្រោះអភិវឌ្ឍពិតប្រាកដ គឺដើម្បីបម្រើផលប្រយោជន៍ប្រជារាស្ត្រ និងធ្វើឲ្យជីវភាពប្រជារាស្ត្ររីកចម្រើនពិតប្រាកដ មិនមែនដូចសព្វថ្ងៃ ដែលគេលួចប្លន់ទ្រព្យសម្បត្តិប្រជារាស្ត្រ បំផ្លាញធនធានធម្មជាតិ ប្រព្រឹត្តអំពើពុករលួយជាប្រព័ន្ធ គិតគូរតែពីផលប្រយោជន៍ក្រុមគ្រួសារគេ និងបក្ខពួកគេ ហើយធ្វើឲ្យប្រជារាស្ត្រកាន់តែក្រវេទនាទៅ ជំពាក់លុយគេវណ្ឌក ត្រូវចំណាកស្រុករាប់លាននាក់ ក្រោមស្លាកអភិវឌ្ឍក្លែងក្លាយរបស់ពួកគេ។
សូម្បីតែ ប្រវត្តិរូប អ្នកដឹកនាំប្រទេសសព្វថ្ងៃ ក៏ជាប្រវត្តិរូបដែលគេច្នៃប្រឌិត ដើម្បីឲ្យជនក្បត់ជាតិ និងជនឧក្រិដ្ឋ អាចក្រាញអំណាចមួយជីវិត ហើយយកប្រទេសកម្ពុជា ធ្វើជាកម្មសិទ្ធិផ្ទាល់ខ្លួនរបស់គេ ដោយបិទបាំងប្រវត្តិសាស្ត្រពិតប្រាកដ នៃប្រទេសកម្ពុជា ក្នុងរយៈពេល ៧០ ឆ្នាំចុងក្រោយនេះ។
ប្រជារាស្ត្រខ្មែរ មិនអាចរំពឹងលើរបបនយោបាយសព្វថ្ងៃទេ ដែលបំផ្លិចបំផ្លាញផលប្រយោជន៍ប្រទេសជាតិយើងឥតឈប់ឈរ ដោយបម្រើតែផលប្រយោជន៍បរទេស និងផលប្រយោជន៍ក្រុមគ្រួសារគេ និងបក្ខពួកគេ មួយក្តាប់តូចតែប៉ុណ្ណោះ។ ខាងគេខាងនោះ ក៏មិនអាចរំពឹងលើទឹកចិត្ត និងការគាំទ្រពីប្រជារាស្ត្រដែរ ពីព្រោះប្រជារាស្ត្រចាប់ផ្តើមយល់ច្បាស់ ពីសារជាតិពិតប្រាកដ នៃអ្នកដឹកនាំប្រទេសសព្វថ្ងៃ។
សូម្បីតែពាក្យសន្យារបស់ពួកគេថ្មីៗនេះ មុនការបោះឆ្នោតឆ្នាំ ២០១៨ ដែលពួកគេសន្យាថា នឹងធ្វើនេះ នឹងធ្វើនោះ ដ៏ល្អប្រពៃនៅថ្ងៃមុខ ក៏ធ្វើឲ្យប្រជារាស្ត្រ អស់សំណើចដែរ។ បើពួកគេ មានចិត្ត មានបំណង និងមានគម្រោង ធ្វើល្អមែន ហេតុអ្វីក៏ពួកគេមិនធ្វើទៅ ក្នុងរយៈពេលដែលខ្លួនបានដឹកនាំប្រទេសជិត ៤០ ឆ្នាំមកហើយ? ហេតុអ្វី ទើបតែសន្យាថានឹងធ្វើល្អទៅថ្ងៃមុខ ពេលការបោះឆ្នោតឆ្នាំ ២០១៨ ជិតមកដល់?
យើងក៏យល់ គេក៏យល់ ថាពួកគេនឹងចាញ់ឆ្នោតហើយ នៅឆ្នាំ ២០១៨ ខាងមុខនេះ ពីព្រោះប្រជារាស្ត្រអស់ជំនឿលើពួកគេហើយ ហើយប្រជារាស្ត្រទាមទារឲ្យមានការផ្លាស់ប្តូរ។ ដោយសារតែពួកគេ មិនចង់ ហើយមិនព្រមចុះចេញពីតំណែង នៅឆ្នាំ ២០១៨ ខាងមុខនេះ បានជាពួកគេ ប្រើអំណាចកាន់តែ ផ្តាច់ការទៅៗ ដូចជា ការលួចសម្លាប់បញ្ញវន្តអ្នកស្នេហាជាតិ ការចាប់ប្រជាពលរដ្ឋដាក់ពន្ធនាគារកាន់តែច្រើនឡើងៗ ការបិទឬត្រៀមបិទវិទ្យុ និងសារព័ត៌មាន ទាំងខ្មែរ ទាំងបរទេស ដែលហ៊ាននិយាយការពិត ហើយការបណ្តេញចេញអង្គការអន្តរជាតិ ដែលធ្វើសកម្មភាពដោយសន្តិវិធី និងស្របច្បាប់ ដើម្បីលើកតម្កើងលទ្ធិប្រជាធិបតេយ្យ នៅប្រទេសកម្ពុជា។
ទោះជាយ៉ាងណាក៏ដោយ ខ្ញុំនៅតែមានជំនឿថា ជនផ្តាច់ការណាក៏ដោយ ហើយរបបព្រៃផ្សៃណាក៏ដោយ ក៏មិនអាចឈ្នះកម្លាំងប្រជារាស្ត្របានទេ។ ក្នុងឋានៈខ្ញុំ ជាកូនខ្មែរមួយរូប ដែលមានសេរីភាព និងមានលទ្ធភាពខ្លះ ខ្ញុំនឹងខិតខំ ធ្វើសកម្មភាពគ្រប់បែបយ៉ាង និងរិះរកមធ្យោបាយគ្រប់បែបយ៉ាង ប្រកបដោយសីលធម៌ ដើម្បីផ្តល់សេរីភាព និងយុត្តិធម៌ ជូនប្រជារាស្ត្រខ្មែរឲ្យទាល់តែបាន។ ទន្ទឹមនេះ ខ្ញុំនឹងខិតខំផងដែរ ដើម្បីផ្តល់ឯករាជ្យភាព និងអធិបតេយ្យភាពជាតិពេញលេញឡើងវិញ ជូនប្រទេសកម្ពុជា ដែលជាជាតិមាតុភូមិដ៏កម្សត់របស់យើងទាំងអស់គ្នា។
ខ្ញុំសូមអំពាវនាវឲ្យបងប្អូន និងក្មួយៗទាំងអស់ រក្សាជំហរស្នេហាជាតិឲ្យរឹងមាំ ហើយត្រៀមខ្លួនបន្តការតស៊ូរបស់យើង ដើម្បីសេរីភាព និងយុត្តិធម៌ ហើយដើម្បីការពារទឹកដី ប្រទេសកម្ពុជារបស់យើង ឲ្យនៅគង់វង្សជានិរន្តិ៍។
កិច្ចការចំពោះមុខ មុនគេពេលនេះ សូមឲ្យបងប្អូនក្មួយៗណា ដែលមិនទាន់មានឈ្មោះលើបញ្ជីឈ្មោះអ្នកបោះឆ្នោត សូមអញ្ជើញទៅចុះឈ្មោះបោះឆ្នោត ចាប់ពីថ្ងៃទី ០១ ខែកញ្ញា ដល់ថ្ងៃទី ០៩ ខែវិច្ឆិកា ឆ្នាំ ២០១៧ នេះ។
ខ្ញុំក៏សូមអំពាវនាវផងដែរ ឲ្យអ្នកដែលបានយល់ពីសភាពការណ៍សព្វថ្ងៃច្បាស់ហើយ សូមមេត្តាជួយពន្យល់អ្នកដែលមិនទាន់យល់ច្បាស់ ឲ្យយល់ច្បាស់ដូចបងប្អូនក្មួយៗ ដែលកំពុងតែអាន ឬស្តាប់ សាររបស់ខ្ញុំនេះ។
ជាទីបញ្ចប់ខ្ញុំសូមអំពាវនាវ ឲ្យជនជាតិខ្មែរគ្រប់រូប និងគ្រប់មជ្ឈដ្ឋាន មានទាំងអ្នកបម្រើជាតិ គឺមន្ត្រីរាជការ និងអ្នកការពារជាតិ គឺកងកម្លាំងប្រដាប់អាវុធ សូមរួបរួមគ្នាជាធ្លុងមួយ ក្នុងការស្រលាញ់ជាតិ ស្រលាញ់សេរីភាព និងស្រលាញ់យុត្តិធម៌ ហើយក្នុងឆន្ទៈតែមួយគត់ គឺសង្គ្រោះជាតិយើងទាំងអស់គ្នា ឲ្យទាន់ពេលវេលា៕
ជយោកម្ពុជាអមតៈ !
សូមអរគុណ។ សូមជូនពរឲ្យមានសំណាងល្អគ្រប់គ្នា។ សូមជម្រាបលា។
ធ្វើនៅទីក្រុងប៉ារីស ថ្ងៃទី ២៧ ខែសីហា ឆ្នាំ ២០១៧
សម រង្ស៊ី
** ស្ដាប់សាររបស់លោក សម រង្ស៊ី ជូនប្រជារាស្ត្រខ្មែរ។
No comments:
Post a Comment