អយ្យការចោទប្រកាន់លោក សួន សេរីរដ្ឋា ប្រធានគណបក្សអំណាចខ្មែរ ពីបទល្មើសព្រហ្មទណ្ឌច្រើនករណី ‌!!

អយ្យការចោទប្រកាន់លោក សួន សេរីរដ្ឋា ប្រធានគណបក្សអំណាចខ្មែរ ពីបទល្មើសព្រហ្មទណ្ឌច្រើនករណី ‌!!

អាស៊ីសេរី ៖ ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញ លោក លី សុផាណា ឲ្យដឹងតាមការផ្ញើសារថា បន្ទាប់ពីបានសាកសួរ និងពិនិត្យសំណុំរឿងចោទប្រកាន់ជនជាប់ចោទ សួន សេរីរដ្ឋា ចប់សព្វគ្រប់មក អយ្យការអមសាលាដំបូងរាជធានីភ្នំពេញ បានរកឃើញថា អង្គហេតុនៃករណីជនជាប់ចោទរូបនេះ បានប៉ះពាល់ដល់សន្តិសុខសង្គម និងសន្តិសុខនៃកងយោធពលខេមរភូមិន្ទ ជាបទល្មើសព្រហ្មទណ្ឌច្រើនករណី។

ក្នុងបទល្មើសនេះ រួមមាន ទី១ បទញុះញង់កុំឲ្យយោធិនស្ដាប់បង្គាប់ តាមបញ្ញត្តិមាត្រា៤៧១ នៃក្រមព្រហ្មទណ្ឌ។ ទី២ បទធ្វើឲ្យខូចទឹកចិត្តកងទ័ព តាមបញ្ញត្តិមាត្រា៤៧២ នៃក្រមព្រហ្មទណ្ឌ និងទី៣ បទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។

លោក លី សុផាណា បន្តថា ដោយហេតុថាករណីខាងលើជាបទមជ្ឈិមជាក់ស្តែង ហើយសំណុំរឿងនេះបានបំពេញលក្ខខណ្ឌនៃនីតិវិធីនៃការបង្ហាញខ្លួនភ្លាមតាមបញ្ញត្តិមាត្រា៤៧ និងមាត្រា៤៨ នៃក្រមនីតិវិធីព្រហ្មទណ្ឌ អយ្យការអមសាលាដំបូងរាជធានីភ្នំពេញ បានសម្រេចចោទប្រកាន់ និងបញ្ជូនជនជាប់ចោទឈ្មោះ សួន សេរីរដ្ឋា រួមទាំងសំណុំរឿង តាមកំណត់ហេតុស្ដីពីការបង្គាប់ឲ្យចូលបង្ហាញខ្លួនភ្លាមលេខ ០១៨ អ.យ.ឋ ចុះថ្ងៃទី១៤ ខែសីហា ឆ្នាំ២០១៧ ទៅសាលាដំបូងរាជធានីភ្នំពេញ ដើម្បីជំនុំជម្រះ។

ប្រធានគណបក្សអំណាចខ្មែរ លោក សួន សេរីរដ្ឋា ត្រូវបាននគរបាលរាជធានីភ្នំពេញឃាត់ខ្លួនយកទៅសាកសួរ កាលពីរសៀលថ្ងៃទី១៣ សីហា បន្ទាប់ពីលោកសរសេរលើទំព័រហ្វេសប៊ុក (facebook) ទាក់ទងនឹងការបញ្ជាកងទ័ពឲ្យទៅត្រៀមប្រយុទ្ធនឹងកងទ័ពឡាវ កាលពីយប់ថ្ងៃសៅរ៍ ទី១២ សីហា។

នៅលើទំព័រហ្វេសប៊ុករបស់លោក សួន សេរីរដ្ឋា កាលពីថ្ងៃទី១២ សីហា បានបញ្ចេញមតិថា «បើសង្គ្រាមកើតឡើងជាមួយនឹងប្រទេសឡាវ មែន កូនខ្មែរកងទ័ពជាតិ នឹងស្លាប់ក្នុងសមរភូមិយ៉ាងវេទនា ហើយមេទ័ពចោរនឹងឡើងបុណ្យ ប្រមូលលុយ សប្បាយស្រីញីយ៉ាងគគ្រឹកគគ្រេង»។

កាលពីរសៀលថ្ងៃទី១៣ សីហា មន្ត្រីនាំពាក្យក្រសួងមហាផ្ទៃ លោក ខៀវ សុភ័គ ថ្លែងថា សារលើកឡើងរបស់ប្រធានគណបក្សអំណាចខ្មែរ រូបនេះ មិនមែនជាសិទ្ធិបញ្ចេញមតិឡើយ តែជាការប្រមាថមាក់ងាយមកលើកងយោធពលខេមរភូមិន្ទ។

អត្ថបទដែលលោក សួន សេរីរដ្ឋា សរសេរមានខ្លឹមសារទាំងស្រុងថា «សាមកុករបស់លោក ហ៊ុន សែន កំពុងបែកកុក! សេនាប្រមុខដាក់បញ្ជាឲ្យកងទ័ពត្រៀមប្រយុទ្ធ ដាក់ឱសានវាទឲ្យសត្រូវ... តែឱនក្បាលចូលបន្ទាយសត្រូវដើម្បីសុំចរចា! ពេលសង្គ្រាមកើតឡើងជាមួយនឹងប្រទេសឡាវ នោះ លទ្ធផលវានឹងមិនខុសពីសង្គ្រាមដែលកើតឡើងជាមួយនឹងប្រទេសសៀម ទេ! គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា... ហើយមេទ័ពចោរ នឹងឡើងបុណ្យស័ក្ដិ ប្រមូលបានលុយកាក់សប្បាយជាមួយស្រីញីយ៉ាងគគ្រឹកគគ្រេង! តែទោះបីយ៉ាងណា និងទោះបីជាយើងដឹងថា វាជាសង្គ្រាមដើម្បីដំឡើងមុខដំឡើងឋានៈ បំពាក់ខ្លួនឥស្សរៈចោរ បន្លំឲ្យក្លាយទៅជាឥស្សរជនបំភាន់យើងក៏ដោយ... ក៏សូមពលរដ្ឋខ្មែរ យុវជនខ្មែរ ត្រូវរួមសាមគ្គីគ្នាលើកទឹកចិត្ត និងជួយគ្រប់យ៉ាងដែលអាចជួយបានដល់កងទ័ពជាតិរបស់យើង ដែលតែងយកទ្រូងទៅពាំងគ្រាប់រំសេវ ដើម្បីបុព្វហេតុការពារទឹកដីពិតប្រាកដ»។