អតីតមេទ័ព និងជាប្រធានគណបក្សខ្មែររូបរួមជាតិបច្ចុប្បន្នគឺលោកញឹក ប៊ុនឆៃ បានទទួលស្គាល់ពីកំហុសរបស់ខ្លួនដែលបានប្រព្រឹត្តមិនគប្បីមកលើបុរសខ្លាំង ហ៊ុន សែន !!

អតីតមេទ័ព និងជាប្រធានគណបក្សខ្មែររូបរួមជាតិបច្ចុប្បន្នគឺលោកញឹក ប៊ុនឆៃ បានទទួលស្គាល់ពីកំហុសរបស់ខ្លួនដែលបានប្រព្រឹត្តមិនគប្បីមកលើបុរសខ្លាំង ហ៊ុន សែន !!

លោក ញឹក ប៊ុនឆៃ អតីតមេទ័ព និងជាប្រធានគណបក្សខ្មែររូបរួមជាតិបច្ចុប្បន្ន ដែលបានកំពុងជាប់ឃុំក្នុងពន្ឋនាគាររាជធានីភ្នំពេញ (PJ) លោកបានសារភាពទទួលស្គាល់កំហុសរបស់ខ្លួនដែលបានប្រព្រឹត្តមិនគប្បីមកលើលោកនាយករដ្ឋមន្ត្រី ហ៊ុន សែន ដែលធ្វើឲ្យខាតប្រយោជន៍គណបក្សខ្មែររួបរួមជាតិ ។

នៅក្នុងសារលិខិតរបស់អតីតទីប្រឹក្សារាជរដ្ឋាភិបាលឋានៈស្មើឧបនាយករដ្ឋមន្ត្រី លោក ញឹក ប៊ុនឆៃ ដែលត្រូវបានគេបង្ហោះនៅលើផេកហ្វេសប៊ុករបស់លោកកាលពីប៉ុន្មាននាទីមុននេះ អតីតសហរដ្ឋមន្ត្រីក្រសួងការពារជាតិផ្កាយមាស៤រូបនេះបានសរសេរដោយសម្តែងការសោកស្តាយនិងវិប្បដិសារីដែលលោកមិនអាចបន្តបេសកកម្មរួមរស់ជាសហជីវិនី សហជីវិនគណបក្សខ្មែររួបរួមជាតិ និងបានសុំការយោគយល់អធ្យាស្រ័យពីអ្នកគាំទ្រចំពោះកំហុសឆ្គងរបស់លោក ។

យ៉ាងណាក៍ដោយនៅក្នុងសារលិខិតដែលគេបង្ហោះនៅយប់ថ្ងៃទី១៦ ខែសីហា ឆ្នាំ២០១៧នេះ លោក ញឹក ប៊ុនឆៃ មិនបានបញ្ជាក់ពីកំហុសឆ្គងរបស់លោកមួយណានោះទេ ព្រោះលោកត្រូវបានគេចោទពាក់ព័ន្ឋនឹងការនាំចូលសារធាតុញៀននិងផលិតគ្រឿងញៀននៅខេត្តកំពង់ស្ពឺកាលពី១០ឆ្នាំមុន និង លួចមានទំនាក់ទំនងជាមួយគណបក្សសង្គ្រោះជាតិ ។

នៅក្នុងលិខិតដដែលអតីតអនុប្រធានទី២ព្រឹទ្ឋសភា និងធ្លាប់ឡើងកាន់តំណែងខ្ពស់បំផុតជាប្រមុខរដ្ឋស្តីទីនិងបានចុះហត្ថលេខាលើរដ្ឋធម្មនុញ្ញបន្ថែមកាលពីថ្ងៃទី១៣ ខែកក្កដា ឆ្នាំ២០០៤ បន្ទាប់ពីមានការជាប់គាំងនយោបាយនៅក្រោយការបោះឆ្នោតជ្រើសតាំងតំណាងរាស្ត្រអាណត្តិទី៣កាលពីខែកក្កដា ឆ្នាំ២០០៣ ហើយបង្កើតរាជរដ្ឋាភិបាលស្របច្បាប់មួយដឹកនាំដោយលោក ហ៊ុន សែននោះ លោក ញឹក ប៊ុនឆៃ បានកោតសរសើរការដឹកនាំរបស់លោក ហ៊ុន សែន ដែលធ្វើឲ្យមានសន្តិភាពនិងការអភិវឌ្ឍមកដល់ពេលនេះ។

ក្រៅពីការលើកឡើងអំពីបញ្ហាសុខភាពនិងវ័យចំណាស់ លោក ញឹក ប៊ុនឆៃ ក៍ស្នើដល់សហជីវិនី សហជីវិនរបស់លោកសម្រេចចិត្តតាមប្រជាធិបតេយ្យដើម្បីជ្រើសរើសមេដឹកនាំជំនួសលោកផងដែរ ។

លោក ញឹក ប៊ុនឆៃ ត្រូវបានសមត្ថកិច្ចចាប់ខ្លួនកាលពីវេលាថ្ងៃត្រង់ថ្ងៃទី០៣ ខែសីហា ឆ្នាំ២០១៧ ហើយនៅរសៀលថ្ងៃទី០៦ ខែសីហា ប្រធានគណបក្សខ្មែររួបរួមជាតិរូបនេះ ត្រូវបានសាលាដំបូងរាជធានីភ្នំពេញ សម្រេចចោទប្រកាន់ផ្លូវការពីបទសមគំនិតក្នុងបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀនកាលពីឆ្នាំ២០០៧ និងបង្គាប់ឲ្យសមត្ថកិច្ចនាំខ្លួនលោក ញឹក ប៊ុនឆៃ ទៅឃុំបណ្តោះអាសន្ននៅក្នុងពន្ឋនាគាររាជធានីភ្នំពេញ (PJ) ៕