លោកញឹក ប៊ុនឆៃ អតីតអគ្គមេបញ្ជាការរងទីមួយនៃកងយោធពលខេមរភូមិន្ទ និងជាអតីតឧបនាយករដ្ឋមន្ត្រីកូតាខាងគណបក្សរាជានិយមហ៊្វុនស៊ិនប៉ិច ត្រូវបានកម្លាំងនគរបាលរាជធានីភ្នំពេញ ចាប់ខ្លួន និងកំពុងសាកសួរនៅស្នងការក្រុងភ្នំពេញ ពាក់ព័ន្ធបទល្មើសគ្រឿងញៀន នៅស្រុកភ្នំស្រួច ខេត្តកំពង់ស្ពឺ។
អ្នកនាំពាក្យក្រសួងមហាផ្ទៃលោក ខៀវ សុភ័គ ឲ្យដឹងថា លោក ញឹក ប៊ុនឆៃ អតីតឧបនាយករដ្ឋមន្ត្រីកូតាគណបក្សរាជានិយមហ៊្វុនស៊ិនប៉ិច និងជាប្រធានគណបក្សខ្មែររួបរួមជាតិ ត្រូវបានសមត្ថកិច្ចចាប់ខ្លួនហើយ នៅថ្ងៃទី ៣ សីហា នេះ។
លោកបន្តថា មូលហេតុនៃការចាប់ខ្លួននេះ ត្រូវគេរកឃើញថា លោក ញឹក ប៊ុនឆៃ មានជាប់ពាក់ព័ន្ធការផលិតគ្រឿងញៀន នៅស្រុកភ្នំស្រួច ខេត្តកំពង់ស្ពឺ កាលពីឆ្នាំ២០១២។ នៅពេលនេះ លោក ញឹក ប៊ុនឆៃ ត្រូវឃុំខ្លួនបណ្ដោះអាសន្ននៅស្នងការរាជធានីភ្នំពេញ ដើម្បីសាកសួរ មុននឹងបញ្ជូនបន្តនីតិវិធីទៅតុលាការ។
លោក ខៀវ សុភ័គ បន្តថា សមត្ថកិច្ចកំពុងបន្តស្រាវជ្រាវអ្នកពាក់ព័ន្ធដទៃទៀត ប៉ុន្តែលោកបដិសេធបង្ហាញអត្តសញ្ញាណ ដោយទុកឲ្យសមត្ថកិច្ចចាត់ការរឿងនេះបន្តទៀត។
ប្រភព ៖ អាស៊ីសេរី
------------------------------------------------------------
ចំណែកសំណាក់សារព័ត៌មាន Kohsantepheapdaily វិញថា ពាក់ព័ន្ធក្នុងករណីផលិតគ្រឿងញៀននៅស្រុកភ្នំស្រួច ខេត្តកំពង់ស្ពឺ កាលពីខែមីនា ឆ្នាំ២០០៧។
រាជធានីភ្នំពេញ ៖ នៅមុននេះបន្តិច លោកញឹក ប៊ុនឆៃ អតីតឧបនាយករដ្ឋមន្ត្រី ត្រូវបានសមត្ថកិច្ចព្រហ្មទណ្ឌរាជធានីភ្នំពេញធ្វើការចាប់ខ្លួន នារសៀលថ្ងៃទី០៣ សីហា នេះ ពាក់ព័ន្ធក្នុងករណីផលិតគ្រឿងញៀននៅស្រុកភ្នំស្រួច ខេត្តកំពង់ស្ពឺ កាលពីខែមីនា ឆ្នាំ២០០៧។
គួរបញ្ជាក់ថា អាជ្ញាធរមានសមត្ថកិច្ចបានរឹបអូសសារធាតុគីមីជាង៣តោនពីកសិដ្ឋានមួយរបស់លោកជា ជុង ដែលជាអតីតទីប្រឹក្សាលោកញឹក ប៊ុនឆៃ ។
លោកញឹក ប៊ុនឆៃ គឺជាប្រធានគណបក្សខ្មែររួបរួមជាតិ ត្រូវបានរាជរដ្ឋាភិបាលដកតំណែងពីតួនាទីជាឧបនាយករដ្ឋមន្ត្រីដោយសារតែលោកលួចទាក់ទងនឹងបក្សប្រឆាំង ។
កម្លាំងនគរបាលរាជធានីភ្នំពេញ អនុវត្តតាមដីការបស់តុលាការ ដើម្បីនាំខ្លួនលោកញឹក ប៊ុនឆៃ មកសាកសួរនាំនៅស្នងការដ្ឋាននគរបាលរាជធានីភ្នំពេញ ។
ប្រភព ៖ kohsantepheapdaily
No comments:
Post a Comment