លោក ហ៊ុន សែន មិនខ្វល់ពីការកាត់ជំនួយរបស់សហរដ្ឋអាមេរិក និងអំពាវនាវអោយ ប្រជាពលរដ្ឋខ្មែរត្រៀម ស៊ីគល់ចេក នៅពេលអន្តរជាតិផ្តាច់ជំនួយ!-Hun Sen welcomes US aids cut

ជាថ្មីម្ដងទៀត លោក ហ៊ុន សែន បានចំអកឲ្យសហរដ្ឋអាមេរិកថា លោកនឹងមិនខ្វល់ចំពោះការព្រមានកាត់ជំនួយពីកម្ពុជាឡើយ។ ចំណែកអង្គការមិនមែនរដ្ឋាភិបាលដែលឃ្លាំមើលពីគណនេយ្យភាពសង្គម យល់ឃើញថា ទោះចង់មិនចង់ ការកាត់ជំនួយនេះ វានឹងប៉ះពាល់ខ្លាំងទៅដល់ដំណើរការ និងគោលនយោបាយមួយចំនួនដែលរដ្ឋាភិបាលពឹងផ្អែកលើជំនួយរបស់សហរដ្ឋអាមេរិកដែរ។

អ្នកនយោបាយមួយចំនួនដៀមដាមថា យូរៗទៅពួកគេហាក់មិនយល់ពីអ្វីដែលលោក ហ៊ុន សែន កំពុងធ្វើឡើយ។ ការរិះគន់នេះ ធ្វើឡើងនៅពេលលោក ហ៊ុន សែន បង្ហាញជំហរស្វាគមន៍ការកាត់ជំនួយរបស់ប្រទេសមហាអំណាចផ្នែកសព្វាវុធនេះមកកម្ពុជា។ ថ្លែងនៅចំពោះមុខកម្មករកាលពីព្រឹកថ្ងៃទី១៩ ខែវិច្ឆិកា នៅកោះពេជ្រ លោក ហ៊ុន សែន អះអាងថា លោកនឹងមិនខ្វល់សោះឡើយចំពោះការកាត់ជំនួយផ្នែកណាមួយក៏ដោយរបស់សហរដ្ឋអាមេរិកនេះ ព្រោះជំនួយដែលកាត់នោះនឹងមិនប៉ះពាល់ដល់រដ្ឋាភិបាលរបស់លោកឡើយ។

លោក ហ៊ុន សែន ដែលគេចាត់ទុកថា ជាអ្នកនយោបាយដែលប៉ិនប្រសប់ដើរតួកាចផង ស្លូតផង និងពេលខ្លះជាអ្នកនយោបាយចិត្តធម៌ផងនោះ យល់ឃើញថា ជំនួយដែលអាមេរិកគំរាមកាត់ពីកម្ពុជានេះ ប្រាកដណាស់នឹងប៉ះពាល់ដល់បក្សនយោបាយដែលបម្រើឲ្យគោលនយោបាយរបស់អាមេរិក នៅកម្ពុជាទៅវិញទេ។ ជាងនេះទៀត លោក ហ៊ុន សែន បានហៅការគំរាមកាត់ជំនួយពីកម្ពុជានេះ ថាជាការសម្លាប់កូនជឹងរបស់ខ្លួនដែលកំពុងជ្រកក្រោមផ្លាកអង្គការមិនមែនរដ្ឋាភិបាល ហើយកំពុងប្រតិបត្តិការនៅកម្ពុជា ប៉ុណ្ណោះ។

លោកបន្តថា៖ «សូមស្វាគមន៍តែម្ដង! បានសេចក្ដីថាអ្នកឯងនិយាយពីលទ្ធិប្រជាធិបតេយ្យ ហើយអ្នកឯងកាត់ជំនួយពីស្ថាប័ន ជ.គ.ប។ អ៊ីចឹងអ្នកឯងទន្ទឹមនឹងផ្ដួលខ្ញុំមិនដួល អ្នករួមសម្លាប់លទ្ធិប្រជាធិបតេយ្យនៅកម្ពុជា ទៀត ហើយយកល្អអំពាវនាវឲ្យអាមេរិក កាត់ជំនួយអោយអស់ ព្រោះកាត់ទៅវាងាប់សង្គមស៊ីវិលក្នុងស្រុកទាំងអស់»។

សហរដ្ឋអាមេរិក និងប្រទេសជាសម្ព័ន្ធដទៃទៀតរបស់អាមេរិក បានប្រតិកម្មខ្លាំងៗចំពោះការព្យាយាមកម្ទេចសំឡេងប្រឆាំងនៅកម្ពុជា។ ចំណែករដ្ឋាភិបាលវិញ បានបង្ហាញជំហរមិនពេញចិត្តចំពោះសហរដ្ឋអាមេរិកកាន់តែខ្លាំងឡើងៗដែរ ហើយលោក ហ៊ុន សែន ផ្ទាល់តែងប្រតិកម្ម និងចោទប្រកាន់អាមេរិកថា នៅពីក្រោយគម្រោងបដិវត្តពណ៌នៅកម្ពុជាជានិច្ច។

ទោះជាយ៉ាងណា អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ិន មានប្រសាសន៍ថា ផ្អែកតាមច្បាប់ស្ដីពីគណបក្សនយោបាយ ដែលបានអនុម័តរួចហើយ គឺពិតជាបានបិទផ្លូវមិនឲ្យបក្សនយោបាយណាមួយទទួលហិរញ្ញវត្ថុពីប្រភពបរទេសនោះឡើយ។

អ្នកនយោបាយរូបនេះយល់ឃើញថា គេហាក់មិនយល់ពីអ្វីដែលលោក ហ៊ុន សែន ចង់បាននោះដែរ៖ «កន្លងមកមិនមានការផ្ដល់ជំនួយពីសហរដ្ឋអាមេរិក មកឲ្យគណបក្សនយោបាយណាមួយផ្ទាល់ទេ មាតែផ្ដល់ជាលក្ខណៈជាវគ្គបណ្ដុះបណ្ដាលមកឲ្យគណបក្សនយោបាយផ្សេងៗ រួមទាំងគណបក្សប្រជាជនផងដែរ។ ដូច្នេះខ្ញុំមិនយល់ពីអ្វីដែលលោកនាយករដ្ឋមន្ត្រីគាត់លើកឡើងទេ»។

អ្នកជំនាញផ្នែកគណនេយ្យភាពសង្គមយល់ឃើញថា ប្រសិនបើសហរដ្ឋអាមេរិក ពិតជាកាត់ជំនួយពីកម្ពុជាមែន ប្រាកដណាស់ពិតជាប៉ះពាល់ដល់កម្ពុជា។

ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ឲ្យដឹងថា សហរដ្ឋអាមេរិកគឺជាប្រទេសមហាអំណាច ដែលមានប្រទេសជាសម្ព័ន្ធមិត្ត ហើយប្រទេសជាសម្ព័ន្ធទាំងនោះគឺជាប្រភពចំណូលរបស់កម្ពុជា។ លោកបន្តថា បើទោះជាការប៉ះពាល់នេះមិនផ្ទាល់ដល់រដ្ឋាភិបាលក្តី ក៏ឥទ្ធិពលនេះនឹងជះផលអាក្រក់ផ្នែកណាមួយដល់មុខមាត់រដ្ឋាភិបាល ជាពិសេសផ្នែកហិរញ្ញវត្ថុ និងធុរកិច្ចដែរ។

លោក សន ជ័យ៖ «សម្រាប់ខ្ញុំយល់ថា ការកាត់ជំនួយរបស់សហរដ្ឋអាមេរិក វាអាចជះឥទ្ធិពលដល់ម្ចាស់ជំនួយផ្សេងទៀត។ ដូច្នេះវាមិនមែនតែមួយជ្រុងនៃការប្រើជំនួយពីអាមេរិកនោះទេ ព្រោះជំនួយអាមេរិក ជាជំនួយមានឥទ្ធិពលដល់ការសម្រេចចិត្តនៃការផ្ដល់ជំនួយរបស់ប្រទេសមួយចំនួននៅអឺរ៉ុបហ្នឹងដែរ»។

សព្វថ្ងៃរដ្ឋាភិបាលពឹងផ្អែកទាំងស្រុងលើការនាំចេញសំលៀកបំពាក់ តាមរយៈការអនុគ្រោះពន្ធទៅកាន់ប្រទេសជាដៃគូរបស់សហរដ្ឋអាមេរិក រួមមានសហគមន៍អឺរ៉ុបជាដើម។ ក្រៅពីនេះ នៅមានជំនួយផ្នែកបច្ចេកទេស និងផ្នែករដ្ឋបាលផ្សេងទៀតដែលកំពុងដំណើរការនៅក្នុងប្រព័ន្ធរបស់រដ្ឋនៅឡើយដែរ៕ ((អត្ថបទ វិទ្យុអាស៊ីសេរី))