លោកព្រាប កុល (Preap Kol) ប្រើសិទ្ធិជាឯកជនរបស់លោក និងសិទ្ធិជាប្រជាពលរដ្ឋខ្មែរ មិនទទួលស្គាល់តំណាងរាស្ត្រចំនួន ៥៥នាក់ និងបានរំឭកឡើងវិញនូវគោលការស្នូលនៃលទ្ធិប្រជាធិបតេយ្យ សម្រាប់ប្រជាពលរដ្ឋខ្មែរបានយល់ដឹង អ្វីជាស្នូលខ្លឹមពិតនៃលទ្ធិប្រជាធិបតេយ្យ?
ប្រភពព័ត៌មានពីទំព័រហ្វេសប៊ុករបស់លោក ព្រាប កុល (Preap Kol) ចុះផ្សាយថ្មីៗនេះ នៅលើទំព័រហ្វេសប៊ុករបស់លោក មានយ៉ាងដូច្នេះថា៖ "ខ្ញុំបាទ ព្រាប កុល សូមប្រើសិទ្ធិជាឯកជនរបស់ខ្ញុំ និងសិទ្ធិជាប្រជាពលរដ្ឋខ្មែរ ដោយយោងជំពូកទី៧ មាត្រា ៧៦ នៃរដ្ឋធម្មនុញនៃព្រះរាជាណាចក្រកម្ពុជា ដែលចែងអំពីរដ្ឋសភា សូមប្រកាស មិនទទួលស្គាល់តំណាងរាស្ត្រចំនួន ៥៥ រូប ដែលមិនបានទទួលសន្លឹកឆ្នោតពីប្រជាពលរដ្ឋ ដោយផ្ទាល់ ឬតាមរយ:គណបក្សនយោបាយណាមួយតាមរយ:ការបោះឆ្នោត ថាជាតំណាងរបស់ខ្ញុំឡើយ។"
ទន្ទឹមគ្នានេះ លោក ព្រាប កុល (Preap Kol) បានលើកយកនូវគោលការស្នូលនៃលទ្ធិប្រជាធិបតេយ្យ សម្រាប់ប្រជាពលរដ្ឋខ្មែរបានយល់ដឹង អ្វីជាស្នូលខ្លឹមពិតនៃលទ្ធិប្រជាធិបតេយ្យ មកពន្យល់ដល់ប្រជាពលរដ្ឋខ្មែរជាពិសេស សម្រាប់ប្អូនៗយុវជន យុវនារី និងក្មួយៗ ជំនាន់ក្រោយ។
សារពេញទាំងស្រុងរបស់លោកព្រាប កុល មានយ៉ាងដូច្នេះថា៖ "ខ្ញុំសូមរំឭកឡើងវិញនូវគោលការស្នូលនៃលទ្ធិប្រជាធិបតេយ្យ សម្រាប់ប្អូនៗយុវជន យុវនារី និងក្មួយៗ ជំនាន់ក្រោយ៖
១.យន្តការប្រកួតប្រជែងនយោបាយដោយស្មើភាព និងនយោបាយស្អាតស្អំ (clean politics)
២.ការបោះឆ្នោតដោយសេរី ត្រឹមត្រូវ និងយុត្តិធម៌ ក្រោមការចាត់ចែងនៃគណ:កម្មការបោះឆ្នោតឯករាជ្យ។
៣.សេរីភាពក្នុងការសម្តែងមតិ ការគោរព និងទទួលយកមតិរិះគន់
៤.ឯករាជ្យភាពនៃប្រព័ន្ធយុត្តិធម៌ និងនីតិរដ្ឋ (យកច្បាប់ជាធំ)
៥.អព្យាក្រិតភាពនៃកងកម្លាំងប្រដាប់អាវុធ និងមន្ត្រីរាជកាសាធារណ:
៦.តុល្យភាពនៃអំណាចរវាង ស្ថាប័ននីតិប្រតិបត្តិ តុលាការ និងរដ្ឋសភា/ព្រឹទ្ធសភា។
៧.សេរីភាព និងឯករាជ្យភាពសារព័ត៌មាន
៨.យន្តការដឹកនាំរដ្ឋដែលមានការចូលរួម តម្លាភាព និងគណនេយ្យភាព ក្រោមគោលការណ៍អភិបាលកិច្ចល្អ។
៩.ការបង្កើត និងការប្រព្រត្តិទៅនៃគណបក្សនយោបាយមានលក្ខណ:ប្រជាធិបតេយ្យ
បើអ្នកនយោបាយវ័យចំណាស់ មិនព្យាយាមបង្កើតឲ្យមានលក្ខខណ្ឌខាងលើនេះទេ សូមកុំបន្លប់ ឬបំភាន់ ការយល់ដឹងរបស់ក្មេងជំនាន់ក្រោយ។
ជាពិសេសអស់លោក ឬឯកឧត្តម ដែលមានងារជាបណ្ឌិត សូមរក្សាតម្លៃនៃបណ្ឌិតរបស់ខ្លួនផង។ កុំឲ្យក្មេងដៀលត្មិះ៕
No comments:
Post a Comment