លោក សុខសុវណ្ណ វឌ្ឍនាសារពង្ស រហ័សនាមល្បាញល្បីក្នុងបណ្ដាញសង្គមហ្វេសប៊ុក ឈ្មោះថា វីល្លៀម គ័ង (William Guang) បុរសបង្អួតបង្អរទ្រព្យសម្បិត្ត បានរត់ទៅឱបបក្សថ្មីហើយ!! ((បក្សីតូចធ្វើទ្រនំអោយសមនឹងខ្លួន))

លោក សុខសុវណ្ណ វឌ្ឍនាសារពង្ស រហ័សនាមល្បាញល្បីក្នុងបណ្ដាញសង្គមហ្វេសប៊ុក វីល្លៀម គ័ង (William Guang) ដែលជាអតីតអ្នកគាំទ្រគណបក្សសង្គ្រោះជាតិដ៏ល្បីល្បាញមួយនាក់ និងជាអ្នកជំនួញ ដែលតែងតែអួតអាងលើទ្រព្យសម្បិត្តរបស់ជាប់នៅនឹងខ្លួន ដែលអ្នកប្រើប្រាស់បណ្តាញសង្គមហ្វេសប៊ុក បានស្គាល់ច្បាស់នោះ នៅពេលនេះបានបែកធ្លាយព័ត៌មានថាលោក បានរត់ទៅចូលរួមជាមួយគណបក្សខ្មែរសាធារណរដ្ឋ Khmer Nat Party របស់លោក លន់ ឫទ្ធិហើយ។

លោក សុខសុវណ្ណ វឌ្ឍនាសារពង្ស ជាយុវជនដែលល្បាញល្បីឈ្មោះតាមសារព័ត៌មានក្នុងស្រុកនានានោះ បានបែកធ្លាយព័ត៌មានថា លោកបានធ្វើលិខិតស្នើសុំចុះចូល ជាសមាជិកគណបក្សខ្មែរសាធារណរដ្ឋKhmer Nat Party របស់លោក លន់ ឫទ្ធិ កូនប្រុសច្បងលោក សេនាប្រមុខ លន់ នល់។ នេះបើតាមការចេញផ្សាយរបស់គណបក្សខ្មែរសាធារណរដ្ឋ Khmer Nat Party កាលពីថ្ងៃទី១៨ តុលា ឆ្នាំ ២០១៧ នេះ។

នៅថ្ងៃទី០១ ខែកក្កដា ឆ្នាំ២០១៧ កន្លងទៅ លោក សុខសុវណ្ណ វឌ្ឍនាសារពង្ស បានផ្តិតស្នាមមេដៃ ធ្វើលិខិតស្នើសុំលោក ព្រម ពិសិដ្ឋ ដែលជាអតីតមន្ត្រីជាន់ខ្ពស់គណបក្សអំណាចខ្មែររបស់លោកសួន សេរីរដ្ឋា និងបច្ចុប្បន្នជាអនុប្រធានគណបក្សខ្មែរសាធារណរដ្ឋ Khmer Nat Party ដើម្បីសុំចុះចូលជាសមាជិករបស់គណបក្សនេះ។

នៅក្នុងលិខិតដដែលនេះដែរ លោក សុខសុវណ្ណ វឌ្ឍនាសារពង្ស បានសន្យាថានឹងគោរពឲ្យបានខ្ជាប់ខ្ជួននូវលក្ខន្តិកៈ និងបទបញ្ជាផ្ទៃក្នុងរបស់គណបក្សខ្មែរសាធារណរដ្ឋព្រមទាំងបទបញ្ជាផ្សេងៗទៀតរបស់គណបក្ស៕