ក្រុមគ្រូពេទ្យមនុស្សធម៌ស្ម័គ្រចិត្តជាច្រើននាក់ មកពីខេត្តហៃណាន (Hainan) ប្រទេសចិន បានមកព្យាបាលជំងឺបាយភ្នែកជូនប្រជាពលរដ្ឋខ្មែររយៈពេល ៣ថ្ងៃ នៅក្នុងខេត្តសៀមរាប ដោយមិនគិតថ្លៃ។ ក្រុមគ្រូពេទ្យចិន ទាំងនោះបានចាប់ផ្ដើមការពិនិត្យ និងព្យាបាលជំងឺបាយភ្នែក នៅក្នុងមន្ទីរពេទ្យភ្នែក នៃខេត្តសៀមរាប ចាប់ពីថ្ងៃទី២៥ រហូតដល់ថ្ងៃទី២៧ ខែកក្កដា។
ប្រធានមន្ទីរពេទ្យបង្អែកខេត្តសៀមរាប គឺលោក ប៉ែន ផល្គុន។ លោកមានប្រសាសន៍នៅព្រឹកថ្ងៃពុធ ទី២៦ ខែកក្កដា ថា វត្តមានរបស់ក្រុមគ្រូពេទ្យចិន ដែលមកជួយព្យាបាលជំងឺបាយភ្នែក ឱ្យពលរដ្ឋខ្មែរនេះ គឺធ្វើឡើងទៅតាមកិច្ចសហការរវាងអាជ្ញាធរខេត្តហៃណាន របស់ប្រទេសចិន និងអាជ្ញាធរខេត្តសៀមរាប។
លោក ប៉ែន ផល្គុន យល់ថា ភ្នែកគឺមានសារសំខាន់ខ្លាំងណាស់សម្រាប់មនុស្សម្នាក់ៗ បន្ទាប់ពីជីវិត ហើយភាពសុខសាន្ត ព្រមទាំងការរីកចម្រើនផ្នែកសេដ្ឋកិច្ចគ្រួសាររបស់ពលរដ្ឋគ្រប់រូប ក៏ត្រូវពឹងផ្អែកទៅលើភ្នែកមើលឃើញដែរ។ ដូច្នេះការព្យាបាលភ្នែក ដែលមានបញ្ហាឱ្យមើលឃើញវិញ គឺមានគុណតម្លៃខ្ពស់បំផុត៖ «វត្តមានរបស់គ្រូពេទ្យចិន ពិសេសគឺជួយវះកាត់បាយភ្នែក ឱ្យពលរដ្ឋកម្ពុជា បែបនេះគឺជាការចូលរួមដ៏សំខាន់ ធ្វើឱ្យប្រសើរឡើងនូវយុទ្ធសាស្ត្រនៃការទប់ស្កាត់ភាពពិការភ្នែកដល់មនុស្សចាស់»។
ចំណែកក្រុមវេជ្ជបណ្ឌិតចិន មិនបានធ្វើការអធិប្បាយចំពោះការបញ្ជូនគ្រូពេទ្យជាច្រើននាក់មកជួយព្យាបាល និងវះកាត់ជំងឺបាយភ្នែកជូនពលរដ្ឋខ្មែរដោយឥតគិតថ្លៃនោះយ៉ាងណាទេ។ នៅក្នុងខិត្តប័ណ្ណផ្សព្វផ្សាយដំណឹងអំពីការព្យាបាលភ្នែកនោះ ក្រុមគ្រូពេទ្យចិន គ្រាន់តែសរសេរថា ចិន និងកម្ពុជា គឺជាអ្នកជិតខាងល្អដែលស្រឡាញ់គ្នាដូចជាបងប្អូន គឺជាមិត្តល្អស្មោះត្រង់ និងជួយគ្នាទៅវិញទៅមក។
មានពលរដ្ឋខ្មែរមកពីតាមបណ្ដាស្រុកនានា និងពីខេត្តមួយចំនួននៅជាប់នឹងខេត្តសៀមរាប រាប់រយនាក់ បានស្កាត់មកពិនិត្យ និងព្យាបាលភ្នែក ជាមួយគ្រូពេទ្យចិន រយៈពេល ២ថ្ងៃមកហើយ។
អ្នកស្រី អ៊ាម សេង អាយុ ៦៧ឆ្នាំ ដែលខំស្កាត់មកតាំងពីស្រុកព្រែកប្រសប់ ខេត្តក្រចេះ មានប្រសាសន៍ថា អ្នកស្រីមានជំងឺភ្នែកដក់ទឹក និងឡើងបាយរយៈពេលជិត ២ឆ្នាំមកហើយ។ អ្នកស្រីខំស្កាត់ដើម្បីឱ្យគ្រូពេទ្យចិន ជួយព្យាបាលភ្នែកដោយរំពឹងថា វានឹងធ្វើឱ្យភ្នែករបស់គាត់អាចមើលអ្វីៗឃើញច្បាស់ឡើងវិញ៖ «វាចេះតែស្រវាំងហើយរមាសភ្នែកខាងស្ដាំ រួចហើយព្រិលមើលមិនច្បាស់តែម្ដង។ មើលទៅស្រវាំងដូចស្អីបាំងអ៊ីចឹង មើលគេមិនស្គាល់ទេ»។
នេះជាលើកទី២ហើយ ដែលក្រុមគ្រូពេទ្យចិន ខេត្តហៃណាន បានមកព្យាបាលជំងឺបាយភ្នែកជូនពលរដ្ឋខ្មែរ។ កាលពីឆ្នាំ២០១៦ ក្រុមគ្រូពេទ្យចិននេះ ធ្លាប់មកព្យាបាលជំងឺបាយភ្នែកជូនពលរដ្ឋខ្មែរដោយឥតគិតថ្លៃនៅខេត្តសៀមរាប និងខេត្តកំពង់ចាម ដោយជួយវះកាត់ជំងឺបាយភ្នែកដោយជោគជ័យជូនពលរដ្ឋខ្មែរចំនួនជាង ៣០០នាក់។
របាយការណ៍សហគមន៍សុខភាពភ្នែក (Community Eye Health) ឱ្យដឹងថា បច្ចុប្បន្ននេះពលរដ្ឋកម្ពុជា ប្រមាណជាង ២ម៉ឺន ៨ពាន់នាក់ គឺមានបញ្ហាសុខភាពភ្នែកក្នុងមួយឆ្នាំៗ ដោយសារតែផ្ទាំងកញ្ចក់របស់កែវភ្នែកចុះខ្សោយ។
ក្នុងចំណោមពលរដ្ឋខ្មែរដែលមានវ័យចំណាស់ ចាប់ពីអាយុ ៦០ឆ្នាំឡើងទៅ ប្រមាណ ២លាននាក់ គឺមានបញ្ហាជំងឺភ្នែកប្រហែល ៦០% ដែលត្រូវការព្យាបាលចាំបាច់ពីក្រុមវេជ្ជបណ្ឌិតជំនាញ៕
ប្រភព ៖ វិទ្យុអាស៊ីសេរី
No comments:
Post a Comment