បែកធ្លាយរឿងអាស្រូវបញ្ហាដីធ្លីអាចជារឿងពាលស៊ីពាល ខ្លាធំមន្ត្រីពាក់ផ្កាយ ៣ លើស្មា លោក ម៉ក់ ជីតូ ចិត្តក្លាគំរាមបងបុរសខ្លាំង លោក ហ៊ុន សែន!!

បែកធ្លាយរឿងអាស្រូវបញ្ហាដីធ្លីអាចជារឿងពាលស៊ីពាល ខ្លាធំមន្ត្រីពាក់ផ្កាយ ៣ លើស្មា លោក ម៉ក់ ជីតូ ចិត្តក្លាគំរាមបងបុរសខ្លាំង លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ពិតជាមិនធម្មតាមែន បើមិនមែនខ្លាធំ តើនរណាក្លាថ្លើមពាសមេឃហ៊ានប៉ះសាច់ញាតិបុរសខ្លាំងទៅ!? បញ្ហារឿងដីធ្លីជាបញ្ហាធំនៅក្នុងស្រុកខ្មែរ មានគ្រប់ខេត្តក្រុង មិនទាន់រកដំណោះស្រាយបាន...។

Angrut ៖ លោក ហ៊ុន សាន ដែលគេស្គាល់ថា ត្រូវជាបងប្រុសបង្កើតរបស់លោកនាយករដ្ឋមន្រ្តី ហ៊ុន សែន បានចោទប្រកាន់លោកឧត្តមសេនីយ៍ឯកអគ្គស្នងការរងនគរបាលជាតិ ម៉ក់ ជីតូ ថាបានគំរាមនិងការពារជនល្មើសរំលោភយកដីលោកនិងដីកូនរបស់លោកទំហំ ១១៩ហិកតា នៅក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

យ៉ាងណាក៍ដោយ នៅព្រឹកថ្ងៃទី០៨ ខែឧសភា ឆ្នាំ២០១៧ លោកផ្កាយ៣ ម៉ក់ ជីតូ មិនអាចរកការសុំអត្ថាធិប្បាយបានទេ ជុំវិញការចោទប្រកាន់របស់លោក ហ៊ុន សានខាងលើនេះ។

បើតាមលិខិតចោទប្រកាន់របស់លោក ហ៊ុន សាន ផ្ញើជូនលោកឧបនាយករដ្ឋមន្រ្តី ស ខេង និងត្រូវបានគេចែកចាយបន្តគ្នាតាមបណ្តាញសង្គមហ្វេសប៊ុកនិងការចុះផ្សាយរបស់គេហទំព័រមួួចំនួនបានបញ្ជាក់ទៀតថា លោកម៉ក់ ជីតូ តែងតែប្រើអំណាចគាបសង្កត់ជិះជាន់អ្នកស្លូតត្រង់ ដើម្បីប្រយោជន៍ផ្ទាល់ខ្លួន និងបក្ខពួកខិលខូចមួយក្ដាប់តូច និងបានរំខានដល់ការរស់នៅសុខសាន្ដរបស់គ្រួសារលោក និងថាទង្វើរបស់លោក ម៉ក់ ជីតូ បានធ្វើឲ្យបាត់បង់ភាពកក់ក្ដៅ ធ្លាក់ចុះប្រជាប្រិយភាព បាត់បង់សាមគ្គីផ្ទៃក្នុង ជំនឿទុកចិត្តក្នុងជួរបក្សកាន់អំណាច ពិសេសគឺចំពោះក្រុមគ្រួសារលោកដែលជាគ្រួសារថ្នាក់ដឹកនាំប្រទេស។