ភាគច្រើនយើងលឺតែពាក្យប្រជាខ្មែរហៅតុលាការស្រុកខ្មែរថា ដុល្លារការ ឬក៏តុលាកាឡ និងមិនសូវដែលលឺថាមានអង្គការអន្តរជាតិណាមួយសរសើរដល់តុលាការស្រុកខ្មែរឡើយ ។ នេះជាជោគល្អ ឬក៏ជាទង្វើល្អត្រឹមត្រូវរបស់តុលាការសៀមរាប? គ្មានជោគល្អពីណាឡើយ ក្រៅពីទង្វើដ៏ល្អត្រឹមត្រូវរបស់តុលាការខេត្តសៀមរាប នេះអាចចាត់បានថា យូរៗមានម្ដងដល់តុលាការស្រុកខ្មែរក្នុងរបបហ៊ុន សែន ដែលមានអង្គការអន្តរជាតិដល់ទៅ៣បានសរសើរដល់តុលាការខេត្តសៀមរាបដែលបានជួយរកយុត្តិធម៌ដល់ជនរងគ្រោះ។
វិទ្យុអាស៊ីសេរី ៖ អង្គការអន្តរជាតិ៣សរសើរតុលាការខេត្តសៀមរាបដែលជួយរកយុត្តិធម៌ដល់ជនរងគ្រោះ
អង្គការអន្តរជាតិចំនួន៣ ទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ (USAID) អង្គការ Winrock International និងអង្គការបេសកកម្មយុត្តិធម៌អន្តរជាតិ ប្រចាំកម្ពុជា (IJM) សរសើរស្ថាប័នសាលាដំបូងខេត្តសៀមរាប ដែលបានផ្ដន្ទាទោសបុរស ៣នាក់ ពីបទជួញដូរបុរសជនជាតិខ្មែរចំនួន ៦នាក់ ឲ្យទៅធ្វើការនៅលើទូកនេសាទក្នុងប្រទេសថៃ។
ពិរុទ្ធជនទាំង ៣នាក់ មានឈ្មោះ ណាក់ សម្បត្តិ ហៅ កែវ ឈ្មោះ ង៉ែត ផល្លា ហៅ ឡា និងឈ្មោះមឿត គៀ ត្រូវជាប់ពន្ធនាគារ ៨ឆ្នាំ និង ៩ឆ្នាំក្នុងករណីនេះ។ តុលាការបានសម្រេចឲ្យជនរងគ្រោះទាំង ៦នាក់ ទទួលសំណងរដ្ឋប្បវេណីជាប្រាក់ចំនួន ២លាន ដល់ ២៥លានរៀល។
សេចក្ដីថ្លែងការណ៍របស់អង្គការបានបង្ហាញថា ក្រុមជនល្មើសទាំង ៣ បានជ្រើសរើសដឹកជញ្ជូន និងលក់បុរសជនរងគ្រោះទាំង ៦នាក់ ទៅដល់ម្ចាស់ទូកនៅកំពង់ផែក្នុងប្រទេសថៃ។ ជនល្មើសបានរកវិធីធ្វើឲ្យជនរងគ្រោះទាំងនោះ ជាប់លើទូកជាច្រើនឆ្នាំ និងធ្វើការក្នុងលក្ខខណ្ឌការងារដ៏អាក្រក់ ហើយដកហូតប្រាក់ឈ្នួលរបស់ពួកគេ។ ជនល្មើសទាំងនោះ បានប្រើវិធីនេះជាង ៧ឆ្នាំហើយ៕
ប្រភព : វិទ្យុអាស៊ីសេរី
No comments:
Post a Comment