loading...
មន្ត្រីនគរបាលចាប់ពីស្នងការរងខេត្ត ប្រធានការិយាល័យ និងមន្ត្រីនគរបាលដែលពុំមានបុណ្យស័ក្ដិប្រមាណ ១០៤នាក់ ចោទប្រកាន់ថា ស្នងការខេត្តកែប លោក អ៊ីង សំអុល ក្រៅពីប្រព្រឹត្តអំពើពុករលួយហើយ ថែមទាំងបានប្រើអំណាចគាបសង្កត់មន្ត្រីនៅក្រោមបង្គាប់ថែមទៀតផង។លោក អ៊ីង សំអុល ទទួលស្គាល់ថា រឿងប្ដឹងផ្ដល់នេះវាជាការពិត ប៉ុន្តែបញ្ហានេះបានដោះស្រាយបញ្ចប់រួចទៅហើយ។
ថ្វីបើស្នងការខេត្តកែប បញ្ជាក់ថា វិវាទនេះជារឿងចាស់យ៉ាងណាក៏ដោយចុះ មន្ត្រីនគរបាលដែលជាដើមបណ្ដឹងក្នុងសំណុំរឿងនេះ នៅតែអះអាងថា ទំនាស់នេះគឺមិនទាន់បញ្ចប់នៅឡើយទេ ផ្ទុយទៅវិញ ស្នងការខេត្តរឹតតែប្រើឥទ្ធិពល និងអំណាចលើសមុនថែមទៀតផង។
ថ្លែងប្រាប់អាស៊ីសេរី ដោយស្នើសុំមិនបញ្ចេញឈ្មោះមន្ត្រីនគរបាលមួយចំនួនដែលបានដាក់បណ្ដឹងចោទលោក អ៊ីង សំអុល ថាប្រើប្រាស់តួនាទីខុសគោលដៅនេះលើកឡើងថា នៅពេលក្រសួងមហាផ្ទៃ ចុះធ្វើអធិការកិច្ចរួចហើយកាលពីខែកញ្ញា ឆ្នាំ២០១៦ ស្នងការខេត្ត លោក អ៊ីង សំអុល ត្រូវបានដំឡើងឋានៈពីឧត្ដមសេនីយ៍ត្រីផ្កាយ១ ទៅជាឧត្ដមសេនីយ៍ទោផ្កាយ២ ថែមទៀត។ ប្រភពបន្តថា ក្រោយទទួលបានឋានៈមួយកម្រិតទៀតហើយនេះ ស្នងការខេត្តកែប លោក អ៊ីង សំអុល បានដកអធិការក្រុង និងអធិការស្រុកពីររូបចេញពីមុខតំណែងថែមទៀតផង កាលពីថ្ងៃទី៥ ខែមេសា ឆ្នាំ២០១៧។
បើទោះជាមានការចោទប្រកាន់បែបនេះក្ដី ស្នងការខេត្តកែប លោក អ៊ីង សំអុល បដិសេធថា វិវាទនេះបានដោះស្រាយបញ្ចប់រួចរាល់តាំងពីយូរណាស់មកហើយ។ លោកបន្តថា មកដល់ពេលនេះ ស្ថានភាពបានវិលទៅសភាពធម្មតាមិនដូចការចោទប្រកាន់ទៀតទេ។ លោកបន្តថា «អាហ្នឹងក្រសួងគេបានដោះស្រាយហើយ។ គេបង្ហោះ គេបង្ហោះតាំងពីយូរហើយ។ រឿងហ្នឹងគេបានដោះស្រាយចប់សព្វគ្រប់ហើយ»។
ជម្លោះផ្ទៃក្នុងនៃស្នងការដ្ឋាននគរបាលខេត្តកែប នេះ កើតឡើងតាំងពីឆ្នាំ២០១៦ មកម៉េ្លះ។ មន្ត្រីនគរបាលចាប់ពីស្នងការរងខេត្ត ប្រធានការិយាល័យ និងមន្ត្រីនគរបាលនៅថ្នាក់មូលដ្ឋានចំនួន ១០៤នាក់ បានដាក់បណ្ដឹង និងផ្ដិតមេដៃស្នើសុំរដ្ឋមន្ត្រីក្រសួងមហាផ្ទៃ និងលោកនាយករដ្ឋមន្ត្រី ហ៊ុន សែន ជួយអន្តរាគមន៍។ ប៉ុន្តែមន្ត្រីនគរបាលដែលជាដើមបណ្ដឹងទាំងនេះអះអាងថា ពុំមានចម្លើយជាវិជ្ជមានណាមួយនោះទេ។
ឆ្លើយតបរឿងនេះ មន្ត្រីនាំពាក្យក្រសួងមហាផ្ទៃ លោក ខៀវ សុភ័គ ឲ្យដឹងថា ខុទ្ទកាល័យលោក ស ខេង នៅមិនទាន់ទទួលបានពាក្យបណ្ដឹងប្រឆាំងស្នងការខេត្តកែប ពីមន្ត្រីនគរបាលនេះនៅឡើយទេ។ បើទោះជាបែបណា លោក ខៀវ សុភ័គ បញ្ជាក់ថា ដើមបណ្ដឹងមិនប្រាកដថាមានហេតុផលត្រឹមត្រូវគ្រប់រឿងនោះឡើយ ហើយអ្នកដែលត្រូវគេប្ដឹង មិនប្រាកដថាមានកំហុសនោះដែរ សំខាន់ត្រូវសិក្សាពីអង្គហេតុនៃជម្លោះនេះជាមុនសិន។ លោកបន្តថា «មិនមែនតែពាក្យមួយហើយត្រូវ ហើយស្ដាប់ទេ ឬឮតែព័ត៌មានតែមួយជ្រុង ហើយសម្រេចគឺមិនត្រូវទេ ទាល់តែស្ដាប់បានទាំងអស់គ្រប់ជ្រុងជ្រោយ បានធ្វើអីវាត្រូវ។ ដូច្នេះរាល់ពាក្យបណ្ដឹងទាំងឡាយណា ទទួលដើម្បីធ្វើការស៊ើបអង្កេតស្រាវជ្រាវរកពាក្យពិតកម្រិតណា»។
ពាក្យបណ្ដឹងដែលមន្ត្រីនគរបាលចោទប្រកាន់ប្រឆាំងស្នងការខេត្តកែប គឺលោក អ៊ីង សំអុល នេះមាន ១១ចំណុច ក្នុងនោះរកឃើញថា ស្នងការខេត្តស៊ីដាច់លុយទាំងជំនួយពីវៀតណាម និងពីក្រសួង ចាយលុយមិនមានតម្លាភាព និយមបក្ខពួក ប្រើប្រាស់អំណាច និងផ្ដល់មុខតំណែងដល់មន្ត្រីដែលស្និទ្ធនឹងខ្លួនជាថ្នូរនឹងលុយកាក់ ជាដើម។
ជុំវិញរឿងនេះ អ្នកសម្របសម្រួលប្រចាំខេត្តកែប និងខេត្តកំពត នៃអង្គការលីកាដូ (LICADHO) លោក យន់ ផល្លី ដែលតាមដានអំពីវិវាទនេះយល់ឃើញថា ការចោទប្រកាន់របស់មន្ត្រីនគរបាលទាំង ១០៤នាក់ប្រឆាំងស្នងការខេត្ត គឺជាការពិត។ លោកបន្តថា ដើម្បីបញ្ចប់ជម្លោះនេះ ស្ថាប័នជំនាញត្រូវពិនិត្យឲ្យបានល្អិតល្អន់ ដើម្បីផ្ដល់យុត្តិធម៌ដល់ភាគីទំនាស់ទាំងសងខាង។ លោកបន្តថា «បើសិនជាគ្មានដំណោះស្រាយទេ បានន័យថា វិបត្តិផ្លូវរបស់ពួកគាត់ គឺមិនសប្បាយ ហើយការធ្វើការក៏មិនអាចពេញលក្ខណៈបានដែរសម្រាប់ការបម្រើថ្នាក់ក្រោមរបស់ពួកគាត់»។
មន្ត្រីនគរបាលដែលជាដើមបណ្ដឹងក្នុងជម្លោះនេះចោទប្រកាន់ថា ស្របពេលក្រុមអធិការកិច្ចរបស់ក្រសួងមហាផ្ទៃ ស្នើសុំឲ្យរក្សាភាពស្ងប់ស្ងាត់ ផ្ទុយទៅវិញស្នងការខេត្តកែប លោក អ៊ីង សំអុល បានគំរាមកំហែង និងព្រមានចាត់វិធានការប្រឆាំងមន្ត្រីនគរបាលណាដែលនៅតែដឹងរឿង និងកកូរកកាយអំពីរឿងលុយជំនួយ និងកិច្ចការផ្ទៃក្នុងដែលរកឃើញថា មានភាពមិនប្រក្រតីទៀត៕
loading...
ប្រភព : វិទ្យុអាស៊ីសេរី
No comments:
Post a Comment