លោក កឹម សុខា ប្រធានគណបក្សព្រះអាទិត្យ ៖ គ្មានបុគ្គលណាអាចចង្អុលបង្ហាញតំណែងអ្នកដឹកនាំក្រៅពីពលរដ្ឋម្ចាស់ឆ្នោត

រូបថតលោក កឹម សុខា ប្រធានគណបក្សព្រះអាទិត្យ ស្រុកព្រៃឈរ ខេត្តកំពង់ចាម អំពី “យុទ្ធនាការ ឃោសនាបោះឆ្នោតឃុំ-សង្កាត់ គណបក្សសង្គ្រោះជាតិ" នារសៀលថ្ងៃ២៧ ខែឧសភា ឆ្នាំ២០១៧។ Kem Sokha

ប្រធានគណបក្សសង្គ្រោះជាតិ អះអាងជាថ្មីថា សង្គ្រាមនឹងមិនអាចកើតឡើងបានឡើយ ប្រសិនបើគេគ្រាន់តែប្រកួតប្រជែងគ្នាផ្នែកទស្សនៈ ឬគំនិត ពិសេសប្រកួតប្រជែងលើគោលនយោបាយដើម្បីដាក់ជូនប្រជាពលរដ្ឋនោះ។ ការថ្លែងដូច្នេះ ធ្វើឡើងក្នុងពិធីជួបជុំអ្នកគាំទ្រ និងសមាជិករបស់ខ្លួនប្រមាណ ២ពាន់នាក់ ក្នុងពេលឃោសនាការបោះឆ្នោត នៅទីរួមខេត្តកំពង់ធំ នៅព្រឹកថ្ងៃទី២៧ ខែឧសភា។

ប្រធានគណបក្សសង្គ្រោះជាតិ លោក កឹម សុខា អះអាងថា ប្រទេសកម្ពុជា គឺជាកម្មសិទ្ធិរបស់ប្រជាពលរដ្ឋគ្រប់រូប មិនមែនជាកម្មសិទ្ធិរបស់បុគ្គលណា ឬក្រុមណាទេ។ លោកថែមទាំងជំរុញឱ្យប្រជាពលរដ្ឋ មន្ត្រីរាជការ កងកម្លាំងប្រដាប់អាវុធទាំងអស់នាំគ្នាទៅបោះឆ្នោតឱ្យបានគ្រប់ៗគ្នា តាមឆន្ទៈរបស់ខ្លួន មិនមែនបោះឆ្នោតតាមការគំរាមកំហែង ឬចង្អុលបង្ហាញពីបុគ្គលណាមួយឡើយ។

លោកថា គ្មានបុគ្គល ឬបក្សណាអាចចង្អុលបង្ហាញថា តំណែងដឹកនាំប្រទេស ឬដឹកនាំឃុំ-សង្កាត់ ត្រូវផ្ដល់ជូនជននេះ ឬជននោះ និងកូនចៅរបស់ខ្លួនជាអ្នកបន្តវេនបានឡើយ ពីព្រោះប្រជាពលរដ្ឋម្ចាស់ឆ្នោតជាអ្នកកំណត់តែប៉ុណ្ណោះ៖ «យើងត្រូវប្រកួតនៅលើទស្សនៈ នយោបាយរបស់គណបក្សនីមួយៗ។ ទស្សនៈរបស់គណបក្សដែលចូលមកប្រកួតដោយដាក់ជូនប្រជាពលរដ្ឋជាអ្នកសម្រេច។ ការប្រកួតទស្សនៈគឺមិនអាចនឹងកើតមានសង្គ្រាមទេបងប្អូន»។

ការថ្លែងសារនយោបាយរបស់ប្រធានគណបក្សសង្គ្រោះជាតិ ទៅកាន់អ្នកគាំទ្រ និងមហាជននៅខេត្តកំពង់ធំ គឺមិនមានបញ្ហាប្រឈមធំដុំកើតឡើងទេ ដោយមន្ត្រីគណបក្សសង្គ្រោះជាតិខេត្តនេះយល់ព្រមធ្វើពិធីជួបជុំឃោសនាការបោះឆ្នោតរបស់ខ្លួននៅលើទីតាំងដែលអាជ្ញាធរខេត្តបានអនុញ្ញាត។

អាជ្ញាធរខេត្ត ព្រមទាំងមន្ត្រីគណៈកម្មការខេត្តរៀបចំការបោះឆ្នោត បាននៅឃ្លាំមើលការពិធីជួបជុំរបស់គណបក្សប្រឆាំង និងជួយសម្រួលចរាចរណ៍ថែមទៀតផង។

ទាក់ទងបញ្ហាសង្គ្រាមនេះដែរ ទាំងមុនពេលយុទ្ធនាការឃោសនាបោះឆ្នោតក្រុមប្រឹក្សាឃុំ សង្កាត់ និងក្នុងពេលឃោសនា លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បានលើកឡើងម្ដងជាពីរដងថា ប្រសិនបើគណបក្សខ្លួនចាញ់ការបោះឆ្នោតនឹងកើតមានសង្គ្រាមមិនខានឡើយ។ មិនតែប៉ុណ្ណោះ កាលពីថ្ងៃទី២៥ ខែឧសភា លោក ហ៊ុន សែន បញ្ជាក់ថា តំណែងរបស់ខ្លួននឹងផ្ទេរឱ្យអ្នកផ្សេង ប៉ុន្តែមិនមែនផ្ទេរឱ្យគណបក្សផ្សេងនោះទេ ពោលគឺផ្ទេរឱ្យមន្ត្រីក្នុងបក្សរបស់ខ្លួន ឬកូនរបស់ខ្លួនប៉ុណ្ណោះ៖ «ហើយវានិយាយអត់ចេះគិត ខ្ញុំឆ្ងល់តែប៉ុណ្ណឹងទេ បើភ្លើកុំមកលេងជាមួយ ហ៊ុន សែន។ គេចូលមកខំមិនថា ទេវតាក៏គេធ្វើការផ្លាស់មួយឆ្នាំម្ដងដែរ ប៉ុន្តែខ្ញុំបកទៅវិញ ថា មួយឆ្នាំម្ដង ក៏គង់តែគេផ្ទេរឱ្យកូនទេវតាដូចគ្នាដែរ»។

ទោះបីជាប្រសាសន៍របស់លោកនាយករដ្ឋមន្ត្រី ហ៊ុន សែន ថ្លែងអំពីរឿងសង្គ្រាមយ៉ាងណាក្តី ប៉ុន្តែគណៈកម្មាធិការជាតិរៀបចំការបោះឆ្នោត នឹងមិនពិនិត្យសម្ដីទាំងនោះឡើយ ក្រោមហេតុផលថា មិនមានពាក្យបណ្ដឹងជំទាស់ពីគណបក្សនយោបាយ។

មន្ត្រីសម្របសម្រួលស្ដីទីអង្គការលីកាដូ (LICADHO) ខេត្តកំពង់ធំ លោក ឈួម រុណ ដែលបានចុះឃ្លាំមើលសកម្មភាពជួបជុំឃោសនារបស់គណបក្សសង្គ្រោះជាតិ យល់ថា ការឃោសនាថា មានសង្គ្រាមនៅពេលគណបក្សខ្លួនចាញ់ឆ្នោតជារឿងផ្ទុយទៅនឹងច្បាប់ជាតិ ព្រមទាំងច្បាប់អន្តរជាតិផង៖ «ខ្ញុំបានចុះទៅតាមភូមិឃុំនីមួយៗ ហើយបានសាកសួរពាក្យហ្នឹងដែរ ប្រជាពលរដ្ឋហ្នឹងគាត់មិនស្រលាញ់ពេញចិត្តចំពោះពាក្យថាមានសង្គ្រាមទេ»។

ក្រោយពេលបញ្ចប់ការជួបជុំនៅទីរួមខេត្តកំពង់ធំ លោក កឹម សុខា បានធ្វើដំណើរមកចូលរួមពិធីជួបជុំឃោសនាការបោះឆ្នោតមួយទៀត ដែលរៀបចំនៅស្រុកបារាយណ៍ ហើយក៏បន្តដំណើរមកឃោសនានៅខេត្តកំពង់ចាម នៅពេលរសៀលថ្ងៃទី២៧ ខែឧសភា ទៀតផង។

ជាមួយគ្នានេះ មន្ត្រីគណបក្សសង្គ្រោះជាតិ ខេត្តកំពង់ចាម បញ្ជាក់ថា ស្ថានភាពឃោសនាក្នុងខេត្តមួយនេះ នៅទីតាំងចំនួន២ គឺមានបញ្ហាកើតឡើងតិចតួច ប៉ុន្តែមន្ត្រីគណបក្សប្រឆាំងបានសម្របសម្រួលជាមួយមន្ត្រីរៀបចំការបោះឆ្នោតខេត្ត ហើយក៏បានបន្តរៀបចំពិធីឃោសនារហូតដល់ចប់៕