រដូវកាលឃោសនាបោះឆ្នោតបានមកដល់ហើយ គណបក្សមួយចំនួននៅភ្នំពេញចាប់ផ្ដើមឃោសនារកសំឡេងឆ្នោតនៅថ្ងៃដំបូង

គណបក្សនយោបាយទាំង១២ ចាប់ផ្ដើមឃោសនារកសំឡេងឆ្នោតនៅថ្ងៃដំបូង នៅថ្ងៃទី២០ ឧសភា នៅទូទាំងប្រទេស។ ដោយឡែកសម្រាប់នៅរាជធានីភ្នំពេញ គឺមានតែគណបក្សចំនួន២ ដែលហែក្បួនចេញពីគោលដៅ។ គណបក្សខ្លះបើកយុទ្ធនាការហែក្បួនតាមដងផ្លូវ និងរៀបចំពិធីជួបជុំនៅនឹងកន្លែងជាដើម។

គណបក្សធំ២គឺគណបក្សប្រជាជនកម្ពុជា និងគណបក្សសង្គ្រោះជាតិ មានមនុស្សជាច្រើនពាន់បានជួបជុំ និងធ្វើយុទ្ធនាការឃោសនានៅថ្ងៃដំបូង។ គណបក្សប្រជាជនដែលជាបក្សកាន់អំណាចបានជួបជុំជាមួយមន្ត្រី និងអ្នកគាំទ្ររបស់ខ្លួននៅកោះពេជ្រ ដោយមានធ្វើពិធីចងកំហឹង រំលឹកពីភាពខ្លោចផ្សា ទុក្ខវេទនា និងការឈឺចាប់របស់ពលរដ្ឋខ្មែរក្នុងរបបខ្មែរក្រហម។

ក្បួនរថយន្តដង្ហែរបស់គណបក្សប្រជាជនកម្ពុជា(ឆ្វេង) ចេញពីកោះពេជ្រ និងក្បួនជួបជុំរបស់គណបក្សសង្គ្រោះជាតិ (ស្ដាំ) នៅផ្លូវ៦០ម៉ែត្រ នៅថ្ងៃទី២០ ខែឧសភា ឆ្នាំ២០១៧។ RFA/Brach Chev and Morm Moniroth

អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា ថ្ងៃជួបជុំនៃការឃោសនាដំបូង គណបក្សរបស់លោក មានមន្ត្រី និងអ្នកគាំទ្រប្រមាណ៥ម៉ឺននាក់នៅកោះពេជ្រ។ លោកបន្តថា ក្រោយជួបជុំ ពួកគេបំបែកគ្នាហែទៅតាមសង្កាត់រៀងៗខ្លួន នៅរាជធានីភ្នំពេញ។

ចំណែកគណបក្សសង្គ្រោះជាតិ មន្ត្រីនិងសកម្មជនរបស់ខ្លួនរាប់ពាន់នាក់ បានជួបជុំគ្នានៅផ្លូវ ៦០ម៉ែត្រ និងហែតាមផ្លូវមួយចំនួនក្នុងរាជធានីភ្នំពេញ។

ថ្លែងនៅមុនពិធីហែក្បួនឃោសនា ប្រធានគណបក្សសង្គ្រោះជាតិ លោក កឹម សុខា ថា លោកនឹងដកមេឃុំនយោបាយណា នៅពេលគណបក្សរបស់លោកជាប់ឆ្នោត បើរកឃើញថា មេឃុំរូបនោះមិនបម្រើផលប្រយោជន៍សាធារណៈ ហើយលោកសន្យាលើកកម្ពស់សេវាសាធារណៈ និងគោលនយោបាយអាទិភាព៥ចំណុចរបស់ខ្លួន។

រីឯគណបក្សខ្មែររួបរួមជាតិខ្មែរ ក៏ធ្វើពិធីហែឃោសនារបស់ខ្លួន នៅខណ្ឌជ្រោយចង្វារ ខណៈគណបក្សមួយចំនួនទៀត មិនទាន់មានសកម្មភាពហែក្បួននៅឡើយ។