លោកនាយករដ្ឋមន្ត្រីហ៊ុន សែន មានប្រសាសន៍ថា ទៅថ្ងៃខាងមុខ ប្រសិនបើមានសកម្មភាពណាមួយ ក្នុងគោលបំណងដើម្បីផ្តួលរំលំ ប្រាកដណាស់ថានឹងមានការបង្ក្រាប ហើយសូមកុំបន្ទោសទៅលើថ្នាក់ដឹកនាំកងកម្លាំងប្រដាប់អាវុធ។ ដើម្បីជីវិតមនុស្សរាប់លាននាក់ សុខចិត្តកម្ចាត់ចោលមនុស្ស១០០ ឬ២០០នាក់។ លោកនាយករដ្ឋមន្ត្រី បានសង្កត់ធ្ងន់ថា សូមចងចាំថា ត្រកូលហ៊ុន មិនមែនជាអ្នកចូលការបាញ់បោះនោះទេ។ ការថ្លែងរបស់ប្រមុខរដ្ឋាភិបាល បែបនេះ នៅក្នុងពិធីជួបសំណេះសំណាលជាមួយគ្រឹស្ទបរិស័ទ ជាង៤ពាន់នាក់ នៅមជ្ឈមណ្ឌលកោះពេជ្រ នាថ្ងៃទី២៥ ឧសភានេះ។
កន្លងមក លោកនាយករដ្ឋមន្ត្រី ធ្លាប់បានព្រមានថា សូមកុំឲ្យកើតមានស្ថានការណ៍ ឆ្នាំ២០១៣ កើតឡើងជាថ្មី នៅក្នុងការបោះឆ្នោតឆ្នាំ២០១៧-២០១៨។ លោកថា ប្រសិនបើកើតមានព្រឹត្តិការណ៍ដូចឆ្នាំ២០១៣ នោះកងកម្លាំងសមត្ថកិច្ចនឹងចុះបង្ក្រាបភ្លាម ដោយមិនមានការអត់ធ្មត់ទៀតនោះឡើយ។
យ៉ាងណាក៏ដោយ បើយើងក្រឡេកទៅមើល ភាពវឹកវរ ក្រោយការបោះឆ្នោតជាតិ ឆ្នាំ២០១៣ និងការធ្វើបាតុកម្មនៅដើមឆ្នាំ២០១៤ គឺកើតចេញពីការប្រឆាំងនឹងលទ្ធផលបោះឆ្នោត ក្រោមមូលហេតុគ.ជ.ប មិនឯករាជ្យ រួមនឹងការទាមទារលក្ខខណ្ឌការងារមួយចំនួន ពីកម្មកររោងចក្រ។ ប៉ុន្តែដើមចម នៃមូលហេតុទាំង ត្រូវបានសម្រួល តាមរយៈការធ្វើកំណែទម្រង់ ទៅលើគណៈកម្មាធិការជាតិរៀបចំ ការបោះឆ្នោត(គ.ជ.ប) និងការតម្លើងប្រាក់ខែកម្មករជាបន្តបន្ទាប់។ ទន្ទឹមនឹងនេះ កន្លងមក ថ្នាក់ដឹកនាំគណបក្សប្រឆាំង ក៏ធ្លាប់បានបញ្ជាក់ពីការភាពជឿជាក់លើ គណៈកម្មាធិការជាតិរៀបចំការបោះឆ្នោត(គ.ជ.ប) ថ្មីថា នឹងមិនលម្អៀងដូច គ.ជ.ប មុនៗដែរ។
ដូច្នេះ ប្រជាពលរដ្ឋសង្ឃឹមយ៉ាងមុតមាំថា សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ និងការបោះឆ្នោតថ្នាក់ជាតិ ឆ្នាំ២០១៧-២០១៨ ខាងមុខនេះ អ្នកឈ្នះ គឺជាឈ្នះទាំងសប្បាយចិត្ត ហើយអ្នកចាញ់ គឺចាញ់ទាំងអស់ចិត្ត។ ពាក្យសម្តីនេះ ក៏ធ្លាប់ត្រូវបានថ្នាក់ដឹកនាំ គណបក្សសង្គ្រោះជាតិ លើកឡើងផងដែរ៕
ដោយៈសៅ វិសាល
ប្រភព : vayofm
No comments:
Post a Comment