ក្រុមអ្នកឃ្លំាមើល(រដ្ឋសាស្ត្ររបស់សង្គមកម្ពុជា) មិនរំពឹងថាបក្សកាន់អំណាចបន្តឈ្នះដូចការអះអាងរបស់ ហ៊ុន សែន

អ្នកវិភាគនិងអ្នកឃ្លាំមើលសង្គមបានអះអាងប្រហាក់ប្រហែលគ្នាថា ការបោះឆ្នោតឃុំ សង្កាត់អាណត្តិនេះ បក្សកាន់អំណាចនឹងថយការគំាទ្រ ដោយថាបក្សនេះកាន់អំណាចច្រើនឆ្នាំ ភាពអយុត្តិធម៌ក្នុងសង្គមនៅតែបន្តកើតមាន។

ការលើកឡើងនេះ គឺផ្ទុយគ្នានឹងការអះអាងរបស់លោកនាយករដ្ឋមន្ត្រី ហ៊ុន សែន ដែលបានសរសេរនៅលើហ្វេសប៊ុករបស់លោកក្នុងថ្ងៃឃោសនាបោះឆ្នោត កាលពីថ្ងៃទី២០ខែឧសភា ថា គណបក្សប្រជាជនកម្ពុជា នឹងបន្តឈ្នះឆ្នោតដដែល ដោយថាពលរដ្ឋម្ចាស់ឆ្នោតស្រលាញ់គណបក្សកាន់អំណាច «គណបក្សប្រជាជនកម្ពុជា គឺយើងចេះជួយគ្នា និងស្រឡាញ់រាប់អានគ្នា ដូច្នេះហើយទើបបក្សយើងបន្ត ឈ្នះ គឺនៅតែឈ្នះដដែល!»។

អ្នកស្រាវជ្រាវពីការអភិវឌ្ឍសង្គមលោក មាស នី យល់ថា ការបោះឆ្នោតជ្រើសរើសក្រុមប្រឹក្សាឃុំសង្កាត់ នៅថ្ងៃទី៤ ខែមិថុនា ខាងមុខនេះ គណបក្សកាន់អំណាចនឹងថយការគំាទ្រពីម្ចាស់ឆ្នោត ដោយលោកសង្កេតឃើញថា គណបក្សនេះនៅតែប្រើយុទ្ធសាស្ត្រគំរាម បង្ក្រាបលើអ្នកតវ៉ាអហិង្សា ហើយមិនបានជួយ ដោះស្រាយបញ្ហាអយុត្តិធម៌សង្គមជូនពលរដ្ឋម្ចាស់ឆ្នោតបាននៅឡើយ។

លោកយល់ថា «ទោះបីជាមានកំណែទម្រង់ខ្លំាងក្លាយ៉ាងណាក៏ដោយ ក៏យើងឃើញថារដ្ឋាភិបាលរបស់គណបក្សប្រជាជនកម្ពុជា ជាគណបក្សដែលជាប់ឆ្នោតនោះមិនបានជោគជ័យក្នុងការដោះស្រាយជាមួយអំពើអយុត្តិធម៌សង្គមដែលកើតមានឡើងទេ គឺដោយសារតែរដ្ឋាភិបាលភាគច្រើនតែងប្រើវិធានការបង្ក្រាប ជាជាងការដោះស្រាយ ការបង្ក្រាបវាធ្វើឲ្យមានការផ្សព្វផ្សាយនូវកេរ្តិ៍ឈ្មោះមិនល្អរបស់គណបក្ស នៅក្នុងហ្នឹង យើងឃើញថា គណបក្សកាន់អំណាចនឹងត្រូវបាត់ការគំាទ្របន្ថែមទៀតនៅអាណត្តិនេះ»។

សាស្ត្រាចារ្យនយោបាយលោក ឯម សុវណ្ណារ៉ា មានប្រសាសន៍ថា នៅអាណត្តិនេះ បើគណបក្សកាន់ អំណាចធ្វេសប្រហែស ដោយមិនរៀបចំយន្តការដោះស្រាយភាពអយុត្តិធម៌សង្គមស្របតាមតម្រូវការម្ចាស់ ឆ្នោតទេ នោះនឹងធ្វើឲ្យបក្សកាន់អំណាចបាត់បង់ការគំាទ្រនៅអាណត្តិនេះ។

លោកនិយាយថា «ដើម្បីរក្សាការគំាទ្រទៅមុខទៀតបាន គណបក្សកាន់អំណាចត្រូវតែរៀបចំយន្តការឆ្លើយតបទៅនឹងតម្រូវការរបស់ពលរដ្ឋដែលទាមទារ ដែលចង់បាន ឧទាហរណ៍បញ្ហាយុត្តិធម៌នៅក្នុងសង្គម បញ្ហាដីធ្លី បញ្ហាផ្សេងៗដូចជា សុខាភិបាល សេវាសុខភាពសាធារណៈ បញ្ហាពាក់ព័ន្ធទៅនឹងផ្លូវថ្នល់ ស្ទះចរាចរណ៍ លូ ទឹកលិច គឺជាបញ្ហាចំពោះមុខដែលអាជ្ញាធរកាន់អំណាចត្រូវតែឆ្លើយតប បើឆ្លើយតបមិនបានទេ ការគំាទ្រនិងថមថយជៀសមិនផុតទេ»។

នាយកប្រតិបត្តិអង្គការនិចហ្វិច លោក សំ គន្ធាមី កត់សំគាល់ថា ការហែក្បួននិងការជួបជុំគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិក្នុងថ្ងៃឃោសនាបោះឆ្នោតឃុំ សង្កាត់ បង្ហាញកម្លាំងប្រហាក់ប្រហែលគ្នា ប៉ុន្តែលោកថា អ្នកនយោបាយត្រូវផ្ញើសារនយោបាយទៅកាន់ម្ចាស់ឆ្នោតកុំឲ្យមានការភ័យខ្លាច ដើម្បីឲ្យពលរដ្ឋបានទៅបោះឆ្នោតជ្រើសរើសថ្នាក់ដឹកនាំដែលពួកគេពេញចិត្ត។

លោកកត់សំគាល់ថា «អ្នកគំាទ្រការហែក្បួនប្រហាក់ប្រហែលគ្នា ជាដៃគូគ្នាដ៏ល្អមួយហើយ ប៉ុន្តែមេបក្សទំាងអស់ អ្នកដឹកនាំអ្នកនយោបាយក្នុងបក្សមួយៗ សូមរក្សាធ្វើម៉េចកុំឲ្យប្រជាពលរដ្ឋភ័យខ្លាច ប្រើប្រាស់ពាក្យសម្តីធ្វើម៉េច លើកទឹកចិត្តឲ្យប្រជាពលរដ្ឋ អ្នកបោះឆ្នោតទៅចូលរួម ហើយរៀបចំអប់រំ ផ្សព្វផ្សាយពីគោលនយោបាយខ្លួន ដែលខ្លួនត្រូវធ្វើទៅ ហើយធានាថានៅពេលជាប់ឆ្នោតត្រូវធ្វើឲ្យបានតាមការសន្យាធ្វើម៉េចឲ្យបរិយាកាសនយោបាយក្រោយៗវារលូនទៅ»។

ក្នុងលិខិតមួយកាលពីពាក់កណ្តាលខែកុម្ភៈ គណបក្សប្រជាជនកម្ពុជា បានណែនាំឲ្យប្រធានស្ថាប័នរដ្ឋនីមួយៗ ត្រៀមទទួលយកបេក្ខជនរបស់ខ្លួន ដែលគណបក្សនេះថា ពុំបានជាប់ឈ្មោះនៅក្នុងការបោះឆ្នោតឃុំ-សង្កាត់ ឆ្នាំ២០១៧នេះ។

កាលពីបោះឆ្នោតឃុំសង្កាត់ឆ្នាំ២០១២ កម្ពុជា មាន១៦៣៣ឃុំ-សង្កាត់ ពេលនោះ គណបក្សប្រជាជន ឈ្នះបាន១៥៩២មេឃុំ-ចៅសង្កាត់។ គណបក្សសម រង្ស៊ី ឈ្នះបាន ២២ មេឃុំនិង គណបក្សសិទ្ធិមនុស្ស ឈ្នះបាន ១៨មេឃុំ។ ប៉ុន្តែសម្រាប់ការបោះឆ្នោតថ្នាក់ជាតិឆ្នាំ២០១៣ គណបក្សសង្រ្គោះជាតិដែលរួមគ្នារវាងគណបក្សសម រង្ស៊ីនិងសិទ្ធិមនុស្សបានកើនពី២៩អសនៈដល់៥៥អសនៈនៅក្នុងរដ្ឋសភា៕