loading...
សហរដ្ឋអាមេរិក បានស្នើឱ្យរដ្ឋាភិបាលកម្ពុជា ត្រូវគិតគូរចំពោះការលើកឡើងរបស់សហភាពអឺរ៉ុប និងឧត្ដមស្នងការអង្គការសហប្រជាជាតិ ដែលបានទាមទារឱ្យដោះលែងមន្ត្រីការពារសិទ្ធិមនុស្សអាដហុក (ADHOC) និងមន្ត្រី គ.ជ.ប កំពុងជាប់ឃុំ។ ប៉ុន្តែមន្ត្រីរដ្ឋាភិបាលឆ្លើយតបថា ការទាមទារបែបនេះគឺជាការមាក់ងាយ និងជាការឈ្លានពានមកលើអធិបតេយ្យភាពកម្ពុជា។
នៅក្នុងសេចក្ដីថ្លែងការណ៍របស់មន្ត្រីនាំពាក្យក្រសួងការបរទេសសហរដ្ឋអាមេរិក ដែលចេញផ្សាយនៅថ្ងៃទី៥ ខែឧសភា ឱ្យដឹងថា សហរដ្ឋអាមេរិក គាំទ្រចំពោះការចេញសេចក្ដីថ្លែងការណ៍របស់សហភាពអឺរ៉ុប និងការិយាល័យនៃឧត្ដមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស ពាក់ព័ន្ធនឹងការឃុំខ្លួនដោយគ្មានការកាត់ទោសរយៈពេលពេល ១ឆ្នាំ និងការបន្តឃុំខ្លួនរយៈពេល ៦ខែទៀត មកលើមន្ត្រីការពារសិទ្ធិមនុស្សអាដហុក រួមមានអ្នកស្រី លឹម មុន្នី លោក ណៃ វ៉ង់ដា លោក នី សុខា និងលោក យី សុខសាន្ត ព្រមទាំងអគ្គលេខាធិការរង គ.ជ.ប លោក នី ចរិយា។
សហរដ្ឋអាមេរិក ព្រួយបារម្ភថា ការបន្តឃុំខ្លួននេះ គឺបង្កឱ្យមានផលប៉ះពាល់ទៅដល់ក្រុមគ្រួសាររបស់ពួកគេ និងការព្រួយបារម្ភអំពីការពន្យារពេលបើកសវនាការដោយគ្មានហេតុផលត្រឹមត្រូវ។ លើសពីនេះ សហរដ្ឋអាមេរិក ក៏បានគូសបញ្ជាក់អំពីទស្សនៈរបស់ក្រុមការងារនៃអង្គការសហប្រជាជាតិដែលធ្វើការងារទាក់ទងនឹងការឃុំខ្លួនតាមអំពើចិត្ត កាលពីខែវិច្ឆិកា ឆ្នាំ២០១៦ ដែលបញ្ជាក់ថា ការឃុំខ្លួនអ្នកទាំង៥នេះ គឺធ្វើឡើងតាមអំពើចិត្តប៉ុណ្ណោះ។
សហរដ្ឋអាមេរិកលើកទឹកចិត្តដល់កម្ពុជា គួរគិតពិចារណាឡើងវិញឱ្យបានប្រុងប្រយ័ត្នចំពោះអនុសាសន៍ទាំងនេះ និងត្រូវគោរពតាមកាតព្វកិច្ចដែលមានក្នុងគោលការណ៍សិទ្ធិមនុស្សអន្តរជាតិ។
ទោះជាយ៉ាងនេះក្ដី មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ប្រតិកម្មថា កម្ពុជានឹងមិនរំលាយអធិបតេយ្យភាពរបស់ខ្លួនដើម្បីតម្រូវចិត្តរបស់អន្តរជាតិទាំងនេះឡើយ។ លោកបញ្ជាក់ថា សហភាពអឺរ៉ុប ឧត្ដមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្ស និងសហរដ្ឋអាមេរិក គឺគ្រាន់តែជាដៃគូអភិវឌ្ឍន៍របស់កម្ពុជា ប៉ុណ្ណោះ ដូច្នោះមិនមែនជាចៅហ្វាយរបស់កម្ពុជា នោះទេ៖ «»។
មន្ត្រីរដ្ឋាភិបាលដដែលនេះ បញ្ជាក់ថា សំណុំរឿងរបស់មន្ត្រីការពារសិទ្ធិមនុស្សទាំង ៤នាក់ និងមន្ត្រី គ.ជ.ប ម្នាក់ ដែលជាជនជាប់ចោទ គឺកំពុងស្ថិតក្នុងកាតព្វកិច្ចរបស់តុលាការ ដែលពួកគេអាចបន្តប្ដឹងឡើងទៅសាលាឧទ្ធរណ៍ទៀត ដូច្នោះក្នុងរយៈពេលនេះ មិនអាចមានការលូកលាន់បាននោះទេ ហើយការផ្ដល់យុត្តិធម៌ គឺជាតួនាទីរបស់តុលាការប៉ុណ្ណោះ។
ប៉ុន្តែប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ថ្លែងថា នៅពេលអង្គការសហប្រជាជាតិ សហភាពអឺរ៉ុប និងសហរដ្ឋអាមេរិក បានចេញសេចក្ដីថ្លែងការណ៍ដូចគ្នា រិះគន់អំពីការឃុំខ្លួនមន្ត្រីសិទ្ធិមនុស្ស និងទាមទារឱ្យដោះលែងបែបនេះ ដូច្នោះកម្ពុជា ដែលជាសមាជិករបស់អង្គការសហប្រជាជាតិ និងជាប្រទេសមួយដែលបានផ្ដល់សច្ចាប័នជាច្រើនពាក់ព័ន្ធនឹងបទដ្ឋានអន្តរជាតិស្ដីពីសិទ្ធិមនុស្សផង គូរតែពិនិត្យឡើងវិញ៖ «»។
មន្ត្រីសិទ្ធិមនុស្សរូបនេះអះអាងថា នៅពេលដែលរដ្ឋាភិបាលតែងតែទាត់ចោលការរិះគន់ពីអន្តរជាតិ និងចាត់ទុកថា ជាការជ្រៀតជ្រែកកិច្ចការផ្ទៃក្នុងបែបនេះ គឺធ្វើឱ្យកម្ពុជា ខាតបង់ទៅវិញទេ ព្រោះអាចនាំឱ្យប្រទេសម្ចាស់ជំនួយនានា បង្អាក់ជំនួយ ហើយនាំឱ្យមានការរិះគន់កាន់តែខ្លាំងថែមទៀត។
លោក អំ សំអាត យល់ថា ការរិះគន់របស់អន្តរជាតិស្ដីពីចន្លោះប្រហោងនៃការគោរពសិទ្ធិមនុស្សមិនបានពេញលេញនៅកម្ពុជា មិនមែនជាការជ្រៀតជ្រែកកិច្ចការផ្ទៃក្នុងឡើយ ព្រោះក្នុងកិច្ចព្រមព្រៀងទីក្រុងប៉ារីស ២៣ តុលា បានចែងថា ក្រុមប្រទេសម្ចាស់ហត្ថលេខីទាំងអស់ រួមទាំងអង្គការសហប្រជាជាតិ សហភាពអឺរ៉ុប និងសហរដ្ឋអាមេរិក ជាដើម មានតួនាទីតាមឃ្លាំមើល និងជំរុញឱ្យភាគីកម្ពុជា អនុវត្តឱ្យបានពេញលេញទៅតាមគោលការណ៍សិទ្ធិមនុស្សដែលមានចែងក្នុងកិច្ចព្រមព្រៀងនេះ៕
ប្រភព : វិទ្យុអាស៊ីសេរី
loading...
No comments:
Post a Comment