កលិយុគតេជោរសម្បូរចោរស្របច្បាប់៖ ប៉ូលិសព្រហ្មទណ្ឌកម្រិតស្រាលរាជធានីភ្នំពេញបដិសេធលួចម៉ូតូពលរដ្ឋម្នាក់-PP police accused of stealing motor
ប៉ូលិសព្រហ្មទណ្ឌកម្រិតស្រាលរាជធានីភ្នំពេញ ចេញលិខិតបដិសេធការចោទប្រកាន់របស់ពលរដ្ឋម្នាក់ ដែលបានដាក់ពាក្យប្ដឹងទៅសាលាដំបូងរាជធានីភ្នំពេញ កាលពីថ្ងៃទី០១ កុម្ភៈ ដោយបានចោទប្រកាន់មេប៉ូលិសព្រហ្មទណ្ឌកម្រិតស្រាលក្រុងភ្នំពេញ ថាបានលួចម៉ូតូពលរដ្ឋ។
មេប៉ូលិសព្រហ្មទណ្ឌកម្រិតស្រាលរាជធានីភ្នំពេញ លោក ប៊ុត សត្យា ដែលរងការចោទប្រកាន់ថា បានលួចម៉ូតូមួយគ្រឿងពីពលរដ្ឋ បានបកស្រាយថា ជាការចោទប្រកាន់គ្មានមូលដ្ឋានច្បាប់ និងជាការបំផ្លើសការពិត។
ពលរដ្ឋជាម្ចាស់ម៉ូតូ ឈ្មោះ ឆាយ ម៉ីជូ ភេទស្រី កាលពីថ្ងៃទី០១ កុម្ភៈ បានដាក់ពាក្យបណ្ដឹងទៅអយ្យការអមសាលាដំបូងរាជធានីភ្នំពេញ ចោទប្រកាន់ លោក ប៊ុត សត្យា ថាបានយកម៉ូតូពីបងប្រុសរបស់នាង ដែលត្រូវបានសមត្ថកិច្ចឃាត់ខ្លួនកាលពីខែធ្នូកន្លងទៅ តាមដីកាបង្គាប់ឲ្យចាប់ខ្លួនពាក់ព័ន្ធករណីលួច កាលពីឆ្នាំ២០១៦។
ក្នុងពាក្យបណ្ដឹងបានបញ្ជាក់ថា ម៉ូតូដែលប៉ូលិសបានដកហូតនោះ ជាកម្មសិទ្ធិរបស់នាង ដោយមានឯកសារបញ្ជាក់ នាងបានសុំជួបលោក ប៊ុត សត្យា នៅការិយាល័យ ប៉ូលិសព្រហ្មទណ្ឌកម្រិតស្រាលរាជធានីភ្នំពេញ ដើម្បីសុំយកម៉ូតូប្រើប្រាស់វិញ ព្រោះខាងតុលាការប្រាប់ថា ករណីចាប់បងប្រុសនាង ប៉ូលិសមិនបានបញ្ជូន ម៉ូតូទៅតុលាការនោះទេ។ ប៉ុន្តែ នៅពេលទៅសុំយកម៉ូតូមកវិញ ម៉ូតូត្រូវបានប៉ូលិសក្រុងភ្នំពេញ ផ្លាស់ប្ដូរស្លាកលេខពីស្លាកលេខឯកជន ទៅជាស្លាកលេខនគរបាលវិញ ខណៈដែលមេប៉ូលិសព្រហ្មទណ្ឌកម្រិតស្រាល លោក ប៊ុត សត្យា បានព្យាយាមគេចមុខ មិនព្រមជួបម្ចាស់ម៉ូតូ។
ការិយាល័យព្រហ្មទណ្ឌកម្រិតស្រាលរាជធានីភ្នំពេញ បានទទួលស្គាល់ថា យកម៉ូតូរបស់ជនល្មើសមកដូរស្លាកលេខ និងជិះប្រើប្រាស់ក្នុងអង្គភាពពិតមែន។
ប៉ូលិសបានបកស្រាយ ដោយមិនប្រាប់ឈ្មោះរបស់ព្រះរាជអាជ្ញារងម្នាក់ ថាបានឯកភាពឲ្យរក្សាទុកម៉ូតូ ដែលជនល្មើសធ្លាប់ប្រើប្រាស់ក្នុងសកម្មភាពឆក់ នៅការិយាល័យព្រហ្មទណ្ឌកម្រិតស្រាលរាជធានីភ្នំពេញជាបណ្ដោះអាសន្ន រងចាំការសម្រេចពីស្ថាប័នតុលាការ ប៉ុន្តែ ដោយសារម៉ូតូXR នោះ ជាប្រភេទម៉ូតូប្រដេញ អាចបម្រើការងារព្រហ្មទណ្ឌបានពិសេសបទល្មើសឆក់ ការិយាល័យប៉ូលិសបានដាក់លិខិតសុំខ្ចីម៉ូតូនោះ ពីស្ថាប័នអយ្យការអមសាលាដំបូងរាជធានីភ្នំពេញសិន ដើម្បីយកទៅបម្រើការងារបង្ក្រាបបទល្មើសព្រហ្មទណ្ឌ ក្នុងរាជធានីភ្នំពេញហើយស្ថាប័នអយ្យការក៏បានយល់ព្រមដែរ។
ប្រធានសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា បើទោះជាជនសង្ស័យ បានយកម៉ូតូ ឬរថយន្តរបស់មិត្តភ័ក្ដិ ឬសាច់ញាតិទៅធ្វើជាមធ្យោបាយប្រព្រឹត្តិបទល្មើស ប៉ុន្តែ គួរតែប្រគល់ឲ្យម្ចាស់ដើមវិញ ព្រោះសង្គមខ្មែរតែងមានការខ្ចីសម្ភារៈគ្នាប្រើប្រាស់។ លោក សន ជ័យ យល់ថា សមត្ថកិច្ចមិនគួរយកម៉ូតូរបស់ជនសង្ស័យប្រើប្រាស់នោះទេ ទោះជាប្រើប្រាស់ក្នុងន័យឯកជន ឬអង្គភាពក៏ដោយ ដើម្បីជៀសផុតពីការរិះគន់។ «»
ក្រោយមានពាក្យបណ្ដឹងលើមេប៉ូលិសព្រហ្មទណ្ឌកម្រិតស្រាល ថាមានការស៊ីដាច់ម៉ូតូជនសង្ស័យ អ្នកប្រើប្រាស់បណ្ដាញសង្គមហ្វេសប៊ុក (Facebook) បានរិះគន់ ស្ថាប័នប៉ូលិសព្រហ្មទណ្ឌរាជធានីភ្នំពេញ ថា គ្មានម៉ូតូសម្រាប់សមត្ថកិច្ចក្នុងការប្រតិបត្តិការងារ។
អាស៊ីសេរីមិនទាន់អាចសុំការបំភ្លឺពីមេប៉ូលិសក្រុងភ្នំពេញ លោក ជូន សុវណ្ណ ចំពោះករណីពលរដ្ឋរិះគន់ថា ស្ថាប័នប៉ូលិសព្រហ្មទណ្ឌរាជធានីភ្នំពេញ ថា គ្មានម៉ូតូសម្រាប់សមត្ថកិច្ច ក្នុងការប្រតិបត្តិការងារ។
ប៉ូលិសព្រហ្មទណ្ឌកម្រិតស្រាល បានរុញការទទួលខុសត្រូវលើសំណុំរឿង ដែលពលរដ្ឋចោទប្រកាន់ថា លួចម៉ូតូធំ ម៉ាកXR នេះ ទៅស្ថាប័នអយ្យការអមសាលាដំបូងរាជធានីភ្នំពេញ ប្រសិនបើម្ចាស់ម៉ូតូចង់បានម៉ូតូវិញ ព្រោះប៉ូលិសព្រហ្មទណ្ឌកម្រិតស្រាល អះអាងថា សំណុំរឿងនេះ បានផុតដៃរបស់ការិយាល័យខ្លួនហើយ៕
ចុចស្ដាប់សំឡេង
ប្រភព៖ វិទ្យុអាស៊ីសេរី
No comments:
Post a Comment