មិនជឿ មុខដូចម៉ែអញហ្អេរ..!៖ មន្ត្រីរបស់តេជោរហ៊ុនសែន មិនជឿថាតេជោរហ៊ុនសែនទិញ Like ក្លែងក្លាយ-CPP Spokeperson denies fake like on pm Facebook. LOL!
មន្ត្រីជាន់ខ្ពស់របស់គណបក្សប្រជាជនកម្ពុជា ចាត់ទុកបណ្ដឹងរបស់លោក សម រង្ស៊ី ទៅតុលាការសហព័ន្ធក្នុងរដ្ឋកាលីហ្វ័រញ៉ា ប្រឆាំងករណីលោក ហ៊ុន សែន ទិញចំនួន Like ហ្វេសប៊ុក (Facebook) នោះ គឺជាបណ្ដឹងខ្យល់។ ប៉ុន្តែលោក សមរង្ស៊ី អះអាងថា ក្រុមហ៊ុនហ្វេសប៊ុក នឹងបង្ហាញភស្តុតាងអំពីបញ្ហានេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន កាលពីថ្ងៃទី១២ ខែកុម្ភៈ បានចាត់ទុកពាក្យបណ្ដឹងរបស់លោក សម រង្ស៊ី ទៅតុលាការសហព័ន្ធក្នុងសហរដ្ឋអាមេរិក ដើម្បីឲ្យក្រុមហ៊ុនហ្វេសប៊ុក បង្ហាញភស្តុតាងថា លោក ហ៊ុន សែន បានទិញចំនួន Like ក្លែងក្លាយនោះ ថាជាបណ្ដឹងមិនបានការ ខាតតែវេលា និងគ្មានខ្លឹមសារអ្វីទាំងអស់៖ «ការប្តឹងរបស់ទណ្ឌិត សម រង្ស៊ី នៅតុលាការអាមេរិកនោះ ខ្ញុំយល់ថា អត់បានការ ពីព្រោះគ្មានតុលាការណាមានវិសាលភាពមកគ្របដណ្តប់លើអធិបតេយ្យភាពរបស់កម្ពុជា នោះទេ»។
ប្រតិកម្មរបស់លោក សុខ ឥសាន ធ្វើឡើងក្រោយពីអតីតប្រធានគណបក្សសង្គោះជាតិ លោក សម រង្ស៊ី ប្ដឹងលោក ហ៊ុន សែន នៅតុលាការអាមេរិក ក្នុងរដ្ឋកាលីហ្វ័រញ៉ា (California) កាលពីថ្ងៃទី៩ ខែកុម្ភៈ ដើម្បីសុំឲ្យក្រុមហ៊ុនហ្វេសប៊ុក បង្ហាញភស្តុតាងទាំងឡាយដែលលោក ហ៊ុន សែន និងគូកនបានទិញ "Likes" ឬចំនួនអ្នកចូលចិត្តគណនីហ្វេសប៊ុក របស់លោកប្រមាណ ៩លាន ៤សែននាក់។
លោក សម រង្ស៊ី អះអាងទៀតថា លោក ហ៊ុន សែន ទិញចំនួនហ្វេសប៊ុក Like ក្លែងក្លាយនេះ គឺជាការបន្លំភ្នែកសាធារណជនឲ្យឃើញថា លោកមានអ្នកគាំទ្រច្រើនដើម្បីបង្កើនប្រជាប្រិយភាព។ លោក សម រង្ស៊ី បានចោទប្រកាន់លោក ហ៊ុន សែន ថាបានប្រើប្រាស់ថវិកាដែលបានមកពីការប្រព្រឹត្តអំពើពុករលួយ និងការកិបកេងថវិកាជាតិដើម្បីប្រើប្រាស់សម្រាប់បម្រើផលប្រយោជន៍បុគ្គលប៉ុណ្ណោះ។
លោក សមរង្ស៊ី បានប្រាប់អាស៊ីសេរី កាលពីថ្ងៃទី១២ ខែកុម្ភៈ ថា លោក ហ៊ុន សែន បានចំណាយលុយ ១ម៉ឺន ៥ពាន់ដុល្លារក្នុងថ្ងៃដើម្បីទិញចំនួន Like សម្រាប់ហ្វេសប៊ុករបស់លោក ហើយរហូតមកទល់ពេលនេះ លោក ហ៊ុន សែន បានចំណាយលុយរាប់លានដុល្លាររួចទៅហើយ៖ «គាត់បានទិញ Like ក្លែងក្លាយ ឬ Like សិប្បនិមិត្ត ដែលមានក្រុមហ៊ុនឯកជនគេផលិត។ បើយើងឲ្យលុយគេទៅ គឺនឹងបង្កើនចំនួន Like លើហ្វេសប៊ុក នោះបានហើយ។ ប្រទេសដែលផលិតចំនួន Like ក្លែងក្លាយនេះមានដូចជានៅប្រទេស ឥណ្ឌា (India) ហ្វីលីពីន (Philippine) ម៉ិចស៊ិចកូ (Mexico) ឬប្រទេសប្រស៊ីល (Brazil) ជាដើម»។
ប៉ុន្តែលោក សុខ ឥសាន បដិសេធការចោទប្រកាន់របស់លោក សម រង្ស៊ី។ លោកចាត់ទុកការអះអាងរបស់លោក សម រង្ស៊ី ថាជាការមួលបង្កាច់គ្រប់យ៉ាង។ លោកបន្តថា ប្រសិនបើរដ្ឋាភិបាលមានលុយច្រើនដ៏សន្ធឹកសន្ធាប់ដូច្នេះមែន នោះរដ្ឋាភិបាលនឹងប្រើប្រាស់ធនធាននោះដើម្បីកសាងហេដ្ឋារចនាសម្ព័ន្ធរបស់ប្រទេសជាការប្រសើជាង៖ «ខ្ញុំជឿជាក់ថា អត់មានទិញទេ គឺមហាជន កាលណាគេស្រឡាញ់ គេចូលទៅ Like ហើយ។ ការចោទថា ទិញពីឥណ្ឌានោះ គឺហួសនិស្ស័យតែម្តង»។
ទោះជាយ៉ាងណាក៏ដោយ ការចោទប្រកាន់របស់លោក សម រង្ស៊ី ទៅលើលោក ហ៊ុន សែន ដែលបានចេញចំនួន Like ក្លែងក្លាយរាប់លាននាក់នោះ ហាក់ស៊ីសង្វាក់គ្នាទៅនឹងការចេញផ្សាយលើគេហទំព័រទំនាក់ទំនងសាធារណៈមួយឈ្មោះ បើសស៊ុន ម៉ាស្ទែលលឺ (Burson Marsteller) បានបង្ហាញមុខមនុស្សកំពូលៗចំនួន ៣ មានអ្នក Like ឬចូលចិត្តច្រើនជាងគេនៅតាមបណ្តាញសង្គមហ្វេសប៊ុក។ អ្នកដែលមានលេខរៀងទី១ គឺប្រធានាធិបតីអាមេរិក លោក ដូណាល់ ត្រាំ (Donald Trump) ទី២ គឺនាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) ហើយទី៣ គឺលោក ហ៊ុន សែន តែម្ដង៕
 |
| ទំព័រហ្វេសប៊ុក (Facebook) របស់លោកនាយករដ្ឋមន្ត្រី ហ៊ុន សែន ដែលមានចំនួន Like ជាង ៩លាន។ រូបភាពនៅព្រឹកថ្ងៃទី១៣ កុម្ភៈ ២០១៨។ |
ប្រភព៖ វិទ្យុអាស៊ីសេរី
No comments:
Post a Comment