យោងតាមប្រភពពីសំឡេងវិទ្យុអាស៊ីសេរី ចុះផ្សាយថ្មីៗ បានអោយដឹងថា៖ គណបក្សសង្គ្រោះជាតិនឹងពិចារណាដូរប្រធានបក្សនៅពេលសាលដីកាតុលាការចូលជាស្ថាពរ
ថ្នាក់ដឹកនាំជាន់ខ្ពស់នៃគណបក្សសង្គ្រោះជាតិ គឺលោក សុន ឆ័យ ប្រាប់ក្រុមអ្នកសារព័ត៌មានថា គណបក្សប្រឆាំងមិនបានរឹងទទឹងនឹងច្បាប់នោះទេ ចំពោះការដោះដូរតំណែងប្រធានគណបក្សប្រឆាំង ប៉ុន្តែមិនត្រូវសន្និដ្ឋានថា លោក កឹម សុខា មានទោសមុនពេលតុលាការសម្រេចក្ដីនោះទេ។
ការប្រកាសរបស់មន្ត្រីជាន់ខ្ពស់គណបក្សប្រឆាំងនេះ ធ្វើឡើងនៅក្រោយពេលគណបក្សសង្គ្រោះជាតិ បានប្រជុំជាមួយថ្នាក់ដឹកនាំគណបក្សនៅតាមបណ្ដាខេត្តរាជធានី នៅទីស្នាក់ការគណបក្សប្រឆាំង ក្នុងសង្កាត់ចាក់អង្រែលើ រាជធានីភ្នំពេញ នៅព្រឹកថ្ងៃទី១០ ខែតុលា។
លោក សុន ឆ័យ ប្រាប់ក្រុមអ្នកសារព័ត៌មានថា បក្សប្រឆាំងមិន ដែលរឹងទទឹងក្នុងការផ្លាស់ប្ដូរតំណែងរបស់ប្រធានគណបក្សនោះទេ ដូចករណីការផ្លាស់ប្ដូរ លោក សម រង្ស៊ី អតីតប្រធានគណបក្សសង្គ្រោះជាតិដែរ។
លោក សុន ឆ័យ នៅតែរំលឹកអំពីការសោកស្ដាយ ដែលមានមនុស្សមួយចំនួនបានចោទ លោក កឹម សុខា ជាជនក្បត់ជាតិ មុនមានការសម្រេចពីស្ថាប័នតុលាការ បើទោះតុលាការរងការរិះគន់ថា មិនឯករាជ្យក៏ដោយ។ លោក សុន ឆ័យ បានប្រាប់ដោយមិនបញ្ជាក់ពីឈ្មោះស្ថានទូត ថា គណបក្សកាន់អំណាច ធានាជាមួយមន្ត្រីស្ថានទូតថា មិនរំលាយគណបក្សប្រឆាំងនោះទេ ហើយគណបក្សសង្គ្រោះជាតិក៏កំពុងព្យាយាមបន្ថយកម្ដៅនយោបាយជាមួយគណបក្សប្រជាជនកម្ពុជាដែរ។
អាស៊ីសេរី មិនអាចទាក់ទងអ្នកនាំពាក្យគណបក្សប្រជាជនកម្ពុជា បានទេ នៅថ្ងៃទី១០ តុលា ករណីគណបក្សកាន់អំណាចធានាជាមួយស្ថានទូត និងការបន្ទន់ឥរិយាបថរបស់បក្សប្រឆាំង ដែល ប្រកាសពិចារណាក្នុងការផ្លាស់ប្ដូរប្រធានបក្ស ជំនួសលោក កឹម សុខា នៅពេលតុលាការចេញសាលដីកា។
មេធាវីតំណាងរបស់ក្រសួងមហាផ្ទៃ ធ្លាប់ប្រកាសថា ការប្ដឹងសុំរំលាយបក្សប្រឆាំង ធ្វើឡើងតាមសំណើរបស់គណបក្ស២ គឺគណបក្សយុវជនកម្ពុជា និង គណបក្សហ៊្វុនស៊ិនប៉ិច។ គណបក្សទាំង២នេះ រងការរិះគន់ថា ជាគណបក្សកូនអុក ឬគណបក្សអាយ៉ង របស់គណបក្សកាន់អំណាច។
អ្នកនយោបាយជើងចាស់នៅកម្ពុជា និងជាអតីតឧបនាយករដ្ឋមន្ត្រី អាណត្តិទី១ លោក លឺ ឡាយស្រេង ថ្លែងនៅក្នុងវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃទី៩ ខែតុលា បានសុំអង្វរឲ្យអ្នកដឹកនាំទាំងអស់នៅកម្ពុជា បន្ធូរបន្ថយកម្ដៅនយោបាយនាពេលបច្ចុប្បន្ន។ អ្នកនយោបាយជើងចាស់រូបនេះ ព្រមានថា ប្រសិនបើថ្នាក់ដឹកនាំប្រទេសកម្ពុជានៅតែបណ្ដែតបណ្ដោយឲ្យស្ថានភាពនយោបាយ ឡើងកម្ដៅដូចពេលបច្ចុប្បន្ននេះ កម្ពុជានឹងរងគ្រោះធ្ងន់ធ្ងរណាស់។
លោក សុន ឆ័យ អះអាងថា គណបក្សសង្គ្រោះជាតិមិនចង់ឃើញសហគមន៍អន្តរជាតិណាមួយ ដាក់គំនាបសេដ្ឋកិច្ចមកកម្ពុជានោះទេ ស្របពេលដែលប្រទេសកម្ពុជា កំពុងស្ថិតក្នុងដំណាក់កាលអភិវឌ្ឍន៍។
សម្រាប់គណបក្សប្រឆាំង លោក សុន ឆ័យ ប្រកាសថា នៅតែសង្ឃឹម និងខិតខំឲ្យមានច្រកសម្រាប់ចរចាជាមួយបក្សកាន់អំណាច ដើម្បីបន្ថយកម្ដៅនយោបាយ។ លោកថា តំណែងជា តំណាងរាស្ត្រ ឬគណបក្សប្រឆាំង មិនសំខាន់នោះទេ ប៉ុន្តែការរំលាយបក្សសង្គ្រោះជាតិ គឺជាការប្រឆាំងឆន្ទៈរបស់ពលរដ្ឋខ្មែរ ដែលបានបោះឆ្នោតឲ្យគណបក្សសង្គ្រោះជាតិ។ លោក សុន ឆ័យ ព្រួយបារម្ភអំពីពលរដ្ឋខ្មែរបែកបាក់គ្នា និងការមិនសុខចិត្តរបស់ពលរដ្ឋ នៅពេលរំលាយគណបក្សប្រឆាំង៕
ប្រភព ៖ វិទ្យុអាស៊ីសេរី
No comments:
Post a Comment