អនុប្រធានគណបក្សសង្រ្គោះជាតិ លោកអេង ឆៃអ៊ាង បានថ្លែងសើចចំអកដាក់ទៅគណបក្សនយោ បាយ មួយចំនួនក្នុងស្រុក ដែលគ្មានអាសនៈក្នុងរដ្ឋភាសោះ តែចង់បាននឹងគេដែរ ។
លោក អេង ឆៃអ៊ាង ក៏បានប្រកាសចាត់ទុក គណបក្សមានអំណាចក្នុងរដ្ឋាភិបាលដែលចង់រំលាយ គណបក្សសង្រ្គោះជាតិចោល ហើយយកអាសនៈរបស់គណបក្សសង្រ្គោះជាតិទៅចែកអោយគណ បក្សដែលគ្មានអាសនៈក្នុងរដ្ឋសភាថា ជាក្រុមចោប្លន់ឆន្ទៈរបស់ប្រជាពលរដ្ឋ ។ លោកបន្តថ្លែងថា បើសិនជាគណបក្សទាំងនោះព្រមទទួលយកអាសនៈគណបក្សសង្រ្គោះជាតិដែលជាឆន្ទៈរបស់ប្រជាពលរដ្ឋខ្មែរមែននោះ អ្នកទាំងនោះក៏ជាចោរប្លន់ដូចគ្នា ។
លោក អេង ឆៃអ៊ាង ថ្លែងបែបនេះ ៖ « ហើយអ្នកដែលចង់បាន ចង់ទទួលយកនឹងគួរអោយខ្មាស់គេដែរ ខ្លួនឯងអត់មានតំណាងប្រជាពលរដ្ឋសោះ ហើយទៅទទួលយកនូវអារបស់ដែលទៅប្លន់គេនឹង ណាស់ តើវាថ្លៃថ្នូរទេ វាអត់ថ្លៃថ្នូរទេ » ។
ការថ្លែងលើកឡើងរបស់លោក អេង ឆៃអ៊ាង យ៉ាងដូច្នេះ ធ្វើឡើងនៅក្នុងបទសម្ភាសន៍ជាមួយ វិទ្យុអាស៊ីសេរី កាលពីរាត្រីថ្ងៃទី១១ តុលា ពោលគឺក្រោយពេលដែលមេដឹកនាំកំពូលរបស់គណបក្សកាន់អំណាច គឺលោកនាយករដ្ឋមន្រ្តី ហ៊ុន សែន បាន បានប្រកាសពីបំណងការរំ លាយគណបក្សនយោបាយមួយក្នុងរដ្ឋសភាចោល ហើយយកគណបក្សនយោបាយចំនួន៥ផ្សេងទៀតចែកអាសនៈជំនួសអោយគណបក្សនយោបាយមួយដែលរដ្ឋាភិបាលកំពុងចង់រំលាយ ។
យ៉ាងណាក៏ដោយ បើតាម អគ្គលេខាធិការរដ្ឋសភា លោក ឡេង ប៉េងឡុង អោយដឹងថា សេចក្ដីស្នើច្បាប់ទាំង ៤ ដែលមានខ្លឹមសារដកហូតអាសនៈគណបក្សដែលត្រូវរំលាយយកទៅចែកឲ្យគណបក្សដទៃទៀតនោះ ត្រូវបានគណៈកម្មាធិការអចិន្ត្រៃយ៍នៃរដ្ឋសភា ពិភាក្សាចប់ហើយកាលពីព្រឹកមិញ នេះ ព្រមទាំងបញ្ជូន ទៅគណៈកម្មាធិការជំនាញរដ្ឋសភាដើម្បីពិនិត្យ។
អនុប្រធានគណបក្សសង្រ្គោះជាតិ លោក អេង ឆៃអ៊ាង អោយដឹងថា សេចក្តីស្នើសុំវិសោធនកម្ម ច្បាប់ទាំងបួន គឺ ៖
១-ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ២-ច្បាប់ស្តីពីការបោះឆ្នោតជ្រើសតាំងព្រឹទ្ធសភា ៣-ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ និង៤-ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ ។ លោកបញ្ជាក់ថា ខ្លឹមសារនៃការសុំធ្វើវិសោធនកម្ម ច្បាប់ទាំងបួន នេះ គឺយកអាសនៈរបស់គណបក្សដែលត្រូវរំលាយ ដោយតុលាការ ទៅចែកឲ្យគណបក្សផ្សេងៗ តាមរូបមន្តសមាមាត្រ ដែលចែងក្នុងច្បាប់ទាំងបួន ខាងលើ ។
ទោះជាយ៉ាងណា លោក អេង ឆៃអ៊ាង ជឿជាក់ថា ប្រសិនណាបើកម្ពុជាក្រោមការដឹកនាំដោយរដ្ឋាភិបាលគណបក្សប្រជាជនកម្ពុជាបន្តធ្វើបែបនេះទៀត ប្រាកដជានឹងមានការតវ៉ាពីប្រជាពលរដ្ឋមិនខាន ព្រោះអ្នកទាំងនោះបានលួចឆន្ទៈរបស់ពួកគាត់ ។ លោកក៏មិនជឿថា នឹងមានមនុស្សមុខក្រាស់ឡើង ចង់ក្បិនអង្គុយក្នុងរដ្ឋសភាដោយយកអាសនៈរបស់គណបក្សប្រឆាំងតាមសំណើររបស់គណបក្សកាន់អំណាចនោះទេ ៕
ប្រភព ៖ វិទ្យុសំឡេងព្រះសង្ឃឯករាជ្យ
No comments:
Post a Comment