កូរ៉េខាងជើងសម្ដែងសែន្យានុភាព បង្អួតសព្ពាវុធយុទ្ធោបករណ៍ទំនើបៗ ក្នុងឱកាសខួបកំណើតលោក គីម អ៊ីល ស៊ុង បិតាអ្នកសាងជាតិកូរ៉េខាងជើង និងប្រកាសយ៉ាងអហង្ការថា ត្រៀមខ្លួនព្រមធ្វើសង្គ្រាមនុយក្លេអ៊ែរជាមួយសហរដ្ឋអាមេរិកជាស្រេច។

នៅថ្ងៃសៅរ៍នេះ កូរ៉េខាងជើង បានរៀបចំក្បួនព្យុហយាត្រាសម្ដែងសែន្យានុភាព សព្ពាវុធយុទ្ធោបករណ៍ទំនើបៗដ៏ធំក្រៃលែង ដើម្បីអបអរខួបកំណើតទី ១០៥ របស់លោក គីម អ៊ីលស៊ុង ត្រូវជាជីតានៃ លោក គីម ជុងអ៊ុន ប្រមុខដឹកនាំរបបក្រុងព្យុងយ៉ាង។ នៅក្នុងឱកាសនេះ លោក ឆ យ៉ុង ហេ បងធំទី ២ នៃរបបក្រុងព្យុងយ៉ាង បានសង្កត់ធ្ងន់ថា កូរ៉េខាងជើងបានត្រៀមខ្លួនឆ្លើយតបតាមគ្រប់ទម្រង់វាយប្រហារ ដែលក្នុងនោះរួមបញ្ចូលទាំងការវាយប្រហារនុយក្លេអ៊ែរផងដែរ។

ក្បួនព្យុហយាត្រានាឱកាសខួបកំណើតទី ១០៥ របស់លោក គីម អ៊ីល ស៊ុង នៅឆ្នាំនេះ មានការចូលរួមពីកងកម្លាំងយោធារាប់ម៉ឺននាក់ ដែលក្នុងនោះត្រូវបានបែងចែកជាផែន៖ ដឹកនាំដោយផែនតន្ត្រីយោធា និងតាមពីក្រោយដោយកងទាហានទាំងស្រីទាំងប្រុស ប្រដាប់ដោយឧបករណ៍សង្គ្រាម រួមមានកាំភ្លើងតូច កាំភ្លើងធំ រ៉ុកកែត រថពាសដែក និងមីស៊ីលបាលីស្ទីកជាច្រើនប្រភេទ ដូចជា KN-08, KN-14, SLBM, និង ICBM។ មីស៊ីលពីរប្រភេទចុងក្រោយនេះ គឺ SLBM សម្រាប់បំពាក់លើនាវាមុជទឹក និង ICBM មីស៊ីលបាលីស្ទីកអន្ដរទ្វីប ត្រូវគេជឿថា ជាប្រភេទមីស៊ីលថ្មីចុងក្រោយបង្អស់ដែលកូរ៉េខាងជើងផលិតបាន។

ប្រមុខដឹកនាំកូរ៉េខាងជើង លោក គីម ជុងអ៊ុន ដែលជាចៅបង្កើតរបស់លោក គីម អ៊ីល ស៊ុង បានចូលរួមជាអធិបតីនៅក្នុងព្រឹត្តិការណ៍នេះ។ តាមរយៈការផ្សាយបន្តផ្ទាល់តាមទូរទស្សន៍ គេឃើញលោក គីម ជុងអ៊ុន ក្នុងសម្លៀកបំពាក់ពណ៌ខ្មៅមួយកំប្លេ ឈរសម្លឹងមើលក្បួនព្យុហយាត្រាយ៉ាងយកចិត្តទុកដាក់ ហើយម្ដងៗ លោកទះដៃនិងញញឹមយ៉ាងមោទនៈ សម្រាប់ការបង្អួតយុទ្ធភណ្ឌសង្គ្រាមលើកនេះ។

បើតាមការផ្សាយរបស់ទូរទស្សន៍ជាតិនៃរបបក្រុងព្យុងយ៉ាង នេះគឺជាក្បួនព្យុហយាត្រាធំជាងគេបង្អស់នៅក្នុងប្រវត្តិសាស្ត្រកូរ៉េខាងជើង ដែលធ្វើឡើងដើម្បីអបអរខួបកំណើតស្ថាបនិកនៃប្រទេសកូរ៉េខាងជើង គឺលោក គីម អ៊ីល ស៊ុង។ វាក៏ជាឱកាសបង្ហាញពីអានុភាពនៃអំណាចយោធារបស់កូរ៉េខាងជើង ទៅកាន់ពិភពលោក ជាពិសេសអាមេរិក។ លោក ឆ យ៉ុង ហេ បងធំទី២នៃរបបក្រុងព្យុងយ៉ាង បានសង្កត់ធ្ងន់នៅក្នុងឱកាសនេះថា កូរ៉េខាងជើងបានត្រៀមខ្លួនឆ្លើយតបតាមគ្រប់ទម្រង់វាយប្រហារ ដែលក្នុងនោះរួមបញ្ចូលទាំងការវាយប្រហារនុយក្លេអ៊ែរផងដែរ។

ឥឡូវនេះ អាមេរិកនិងពិភពលោកកំពុងតែរង់ចាំមើលការសម្រេចចិត្តរបស់លោក គីម ជុង អ៊ុន ថាតើមេដឹកនាំជំនាន់ទី៣នៃកូរ៉េខាងជើងនេះ ហ៊ានធ្វើតេស្តន៍នុយក្លេអ៊ែរលើកទី៦ ឬបាញ់មីស៊ីលអន្ដរទ្វីប ICBM ដ៏ថ្មីស្រឡាងដែរឬទេ? ការសម្រេចចិត្តណាមួយក៏ដោយក្នុងចំណោមជម្រើសទាំងពីរនេះ នឹងជំរុញឲ្យអាមេរិកវាយប្រហារកូរ៉េខាងជើង។ គិតត្រឹមពេលនេះ អាមេរិកបានបញ្ជូននាវាដឹកយន្តហោះចម្បាំងមួយគ្រឿងទៅកាន់ឧបទ្វីបកូរ៉េដោយអមជាមួយនាវាបាញ់គ្រាប់មីស៊ីលចំនួន ៣គ្រឿង។ នាវាដឹកយន្តហោះចម្បាំងនោះអាចផ្ទុកយន្តហោះ និងឧទ្ធម្ភាគចក្រពី ៧០ ទៅ ៨០គ្រឿង។ បន្ទាប់មក ក៏មានការបញ្ជូននាវាមុជទឹកបន្ថែមទៀត ហើយនៅថ្ងៃសុក្រ ទី១៤ មេសា ទីប្រឹក្សាម្នាក់ទទួលបន្ទុកនយោបាយការបរទេសរបស់សេតវិមានដែលមិនព្រមបញ្ចេញឈ្មោះបានថ្លែងឲ្យដឹងថា អាមេរិកកំពុងសិក្សាផ្លូវយោធាចំពោះកូរ៉េខាងជើង៕

A submarine-launched Pukguksong-1 ballistic missile is paraded across Pyongyang's Kim Il Sung Square on Saturday. | AP

In what military experts say appears to be a North Korean KN-08 Intercontinental Ballistic Missile (ICMB) is paraded across Kim Il Sung Square during a military parade on Saturday, April 15, 2017, in Pyongyang, North Korea. Wong Maye-E—AP