ក្រុមប្រឹក្សាធម្មនុញ្ញចោទមន្ត្រីជាន់ខ្ពស់នៃអង្គការសិទ្ធិមនុស្សអន្តរជាតិ ថាបានបញ្ចេញមតិ ប៉ះពាល់ស្ថាប័នក្រុមប្រឹក្សាធម្មនុញ្ញ និងស្ថាប័នកំពូលៗដទៃទៀតរបស់កម្ពុជា។ នៅក្នុងសេចក្ដីថ្លែងការណ៍ចុះថ្ងៃទី៣១ ខែកក្កដា នេះ អ្នកនាំពាក្យក្រុមប្រឹក្សាធម្មនុញ្ញ បដិសេធចំពោះការលើកឡើងរបស់លោក ប្រ៊ែដ អាដាម (Brad Adams) នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) និងថ្កោលទោសលោក ប្រ៊ែដ អាដាម ចំពោះការបញ្ចេញមតិមួលបង្កាច់ស្ថាប័នក្រុមប្រឹក្សាធម្មនុញ្ញ ដែលនាំឲ្យសាធារណមតិភាន់ច្រឡំ។
ក្រុមប្រឹក្សាធម្មនុញ្ញចាត់ទុកការលើកឡើងរបស់លោក ប្រ៊ែដ អាដាម ថាបានរំលោភលើឯករាជ្យ អធិបតេយ្យ រំលោភលើរដ្ឋធម្មនុញ្ញ និងកិច្ចការផ្ទៃក្នុងរបស់កម្ពុជា។
សេចក្ដីថ្លែងការណ៍នេះ ជាការឆ្លើយតបទៅនឹងបទសម្ភាសន៍របស់លោក ប្រ៊ែដ អាដាម ជាមួយវិទ្យុអាស៊ីសេរី កាលពីថ្ងៃទី២៩ ខែកក្កដា ដែលអំពាវនាវឲ្យសមាជិកទាំងអស់នៃក្រុមប្រឹក្សាធម្មនុញ្ញ មានភាពក្លាហានហ៊ានចុះចេញពីតំណែងជាបន្ទាន់ ព្រោះមិនបានបំពេញការងាររបស់ខ្លួនជាអ្នកការពារកុំឲ្យមានការរំលោភរដ្ឋធម្មនុញ្ញ។ ក្នុងបទសម្ភាសន៍នោះ លោក ប្រ៊ែដ អាដាម មានប្រសាសន៍ថា “សមាជិកទាំងអស់នៃក្រុមប្រឹក្សាធម្មនុញ្ញ ដែលនាំគ្នាបោះឆ្នោតគាំទ្រសំណើសុំធ្វើវិសោធនកម្មច្បាប់ថ្មី ស្ដីពីគណបក្សនយោបាយ គួរនាំគ្នាលាឈប់ពីតំណែងក្រុមប្រឹក្សានេះភ្លាម ព្រោះមិនបានបំពេញការងារឲ្យស័ក្ដិសមនឹងឈ្មោះជាអ្នករក្សា និងការពាររដ្ឋធម្មនុញ្ញ កុំឲ្យមានការរំលោភបំពាននោះទេ"។
លោក ប្រ៊ែដ អាដាម បន្ថែមថា រដ្ឋធម្មនុញ្ញកម្ពុជា ចែងថា កម្ពុជាប្រកាន់របបប្រជាធិបតេយ្យ សេរីពហុបក្ស។ ក្នុងរបបប្រជាធិបតេយ្យ សេរីពហុបក្ស គេមិនដែលធ្វើច្បាប់ណាហាមឃាត់មេដឹកនាំបក្សប្រឆាំង មិនឲ្យចូលរួមក្នុងការបោះឆ្នោតនោះទេ។ ដូច្នេះសមាជិកគ្រប់រូបនៃក្រុមប្រឹក្សាធម្មនុញ្ញ គួរមានសេចក្ដីក្លាហាន និងចេះមានការខ្មាសអៀន ហ៊ានចុះចេញពីតំណែងភ្លាម កុំនៅបន្តរួមគ្នាធ្វើបំពានបែបនេះតទៅទៀត។
ក្រុមប្រឹក្សាធម្មនុញ្ញដែលមានសមាជិក ៩រូប គឺជាស្ថាប័នកំពូលមួយដែលមានចែងក្នុងរដ្ឋធម្មនុញ្ញ ឆ្នាំ១៩៩៣ សម្រាប់ការពារការគោរពរដ្ឋធម្មនុញ្ញ បកស្រាយរដ្ឋធម្មនុញ្ញ និងច្បាប់ដែលរដ្ឋសភាបានអនុម័ត និងព្រឹទ្ធសភាបានពិនិត្យចប់សព្វគ្រប់ហើយ និងសម្រេចអំពីករណីវិវាទកម្មទាក់ទងនឹងការបោះឆ្នោតជ្រើសតាំងតំណាងរាស្ត្រ និងការបោះឆ្នោតជ្រើសតាំងសមាជិកព្រឹទ្ធសភា។
ត្រឹម ១៥ថ្ងៃប៉ុណ្ណោះ ស្ថាប័ននីតិប្បញ្ញត្តិធំៗ ទាំងរដ្ឋសភា ទាំងព្រឹទ្ធសភា រួមទាំងក្រុមប្រឹក្សាធម្មនុញ្ញផងសុទ្ធតែសម្រេចព្រមៗគ្នា ដោយឥតជំទាស់ និងឥតកែប្រែអ្វីទាំងអស់ទៅតាមខ្លឹមសារ នៃសំណើសុំធ្វើវិសោធនកម្មច្បាប់ថ្មី ស្ដីពីគណបក្សនយោបាយទៅតាមការចង់បានរបស់លោកនាយករដ្ឋមន្ត្រី ហ៊ុន សែន ដែលអង្គការសង្គមស៊ីវិលផ្នែកសិទ្ធិមនុស្សជាតិ និងអន្តរជាតិ ព្រមទាំងគណបក្សប្រឆាំងសុទ្ធតែចាត់ទុកថា មិនស្របតាមរដ្ឋធម្មនុញ្ញ និងផ្ទុយទៅនឹងអនុសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ៕
ប្រភព ៖ វិទ្យុអាស៊ីសេរី
ព័ត៌មានទាក់ទង ៖ នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ(Human Rights Watch)លោកប្រ៊ែដ អាដាម (Brad Adams)ថា៖ សមាជិកក្រុមប្រឹក្សាធម្មនុញ្ញទាំងអស់គួរចុះចេញពីតំណែង
No comments:
Post a Comment