 |
| គណៈកម្មការរៀបចំការបោះឆ្នោតខេត្តបាត់ដំបង។ RFA/Hum Chamroeun |
គណៈកម្មការរៀបចំការបោះឆ្នោតខេត្តបាត់ដំបង រាប់សន្លឹកឆ្នោតឡើងវិញនៅក្នុងឃុំបឹងប្រាំ តាមពាក្យប្ដឹងរបស់គណបក្សសង្គ្រោះជាតិ បន្ទាប់ពីគណបក្សនេះរកឃើញភាពមិនប្រក្រតីធ្ងន់ធ្ងរក្នុងការរាប់សន្លឹកឆ្នោតនាពេលកន្លងទៅ។
ប្រធានគណៈកម្មការរៀបចំការបោះឆ្នោតខេត្តបាត់ដំបង លោក វន ពន មានប្រសាសន៍នៅថ្ងៃទី៩ ខែមិថុនា ថា លទ្ធផលនៃការរាប់សន្លឹកឆ្នោតឡើងវិញនៅឃុំបឹងប្រាំ គណបក្សសង្គ្រោះជាតិ ទទួលបានសំឡេងឆ្នោតកើនឡើងជាង ១០០សំឡេងបន្ថែម ក្នុងចំណោមសន្លឹកឆ្នោតមិនបានការ ឬហៅថា សន្លឹកឆ្នោតខូចជាង ២០០សំឡេង។ លោកបន្ថែមថា គណបក្សប្រជាជនកម្ពុជា ក៏មានសំឡេងឆ្នោតកើនជាង ៤០សំឡេងដែរ។
លោកអះអាងថា សំឡេងឆ្នោតដែលប្រែប្រួលខុសប្រក្រតីនេះ ដោយសារមន្ត្រីប្រចាំការិយាល័យបោះឆ្នោតមិនយល់ពីទម្រង់នៃសន្លឹកឆ្នោតបានការ និងមិនបានការ៖ «បញ្ហាមកពីយើងបណ្ដុះបណ្ដាលមានរយៈពេលខ្លី កត្តាទី២ ធនធានយើងរើសដាក់ភ្លាមៗ ព្រោះអ្នកមុនគាត់ឈប់ដែលធ្វើឲ្យចូលថ្មី មិនសូវច្បាស់លាស់ បំពេញការងារបោះឆ្នោតមិនបានល្អ»។
ការរាប់សន្លឹកឆ្នោតកាលពីថ្ងៃទី៤ ខែមិថុនា គណបក្សសង្គ្រោះជាតិ ចាញ់គណបក្សប្រជាជនកម្ពុជា ជាង ២០សំឡេង ប៉ុន្តែសំឡេងឆ្នោតមិនបានការមានជាង ២០០សំឡេង។
មន្ត្រីសម្របសម្រួលអង្គការលីកាដូ (LICADHO) ខេត្តបាត់ដំបង លោក ហេង សាយហុង ដែលបានទៅឃ្លាំមើលការរាប់សន្លឹកឆ្នោតសារដើមអះអាងថា សំឡេងឆ្នោតដែលប្រែប្រួលធ្វើឲ្យគណបក្សប្រឆាំងឈ្នះឆ្នោតនៅឃុំបឹងប្រាំ បន្ថែមមួយឃុំទៀត ដែលលទ្ធផលសំឡេងឆ្នោតបណ្ដោះអាសន្នគណបក្សសង្គ្រោះជាតិឈ្នះពី ៤៨ឃុំ ទៅ ៤៩ឃុំសង្កាត់វិញ ចំណែកបក្សកាន់អំណាចបាត់បង់ឃុំមួយ គឺពីឈ្នះបាន ៥៤ឃុំ មកនៅ ៥៣ឃុំសង្កាត់វិញ។
លោកចាត់ទុកបញ្ហានេះថា អាចជាចេតនាបន្លំសន្លឹកឆ្នោតរបស់គណៈកម្មការប្រចាំនៅការិយាល័យបោះឆ្នោតនៅឃុំបឹងប្រាំ៖ «រឿងនេះមន្ត្រីពាក់ព័ន្ធគួរតែចាត់វិធានការផ្លូវច្បាប់ទៅលើមន្ត្រីប្រចាំនៅការិយាល័យរាប់សន្លឹកនោះ និងមិនត្រូវបណ្ដោយឲ្យអ្នកទាំងនោះ រួចខ្លួនទេ ព្រោះជាទង្វើខុសច្បាប់ បោះឆ្នោត ដើម្បីឲ្យការបោះឆ្នោតមានយុត្តិធម៌»។
ទោះជាយ៉ាងណា គណៈកម្មការរៀបចំការបោះឆ្នោតខេត្តបាត់ដំបង មិនទាន់សម្រេចឲ្យគណបក្សណាឈ្នះឆ្នោតនៅក្នុងឃុំមួយនេះនៅឡើយ គឺបានបញ្ជូនលទ្ធផលថ្មីនេះទៅគណៈកម្មការជាតិរៀបចំការបោះឆ្នោតសម្រេចបន្ត។ អាស៊ីសេរី ពុំអាចទាក់ទងអ្នកពាក្យគណៈកម្មការជាតិរៀបចំការបោះឆ្នោត លោក ហង្ស ពុទ្ធា ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី៩ ខែមិថុនា ដោយទូរស័ព្ទរបស់លោកពុំមានអ្នកទទួល៕
ប្រភព : វិទ្យុអាស៊ីសេរី
No comments:
Post a Comment